HeSheEat—相信香港人絕對唔陌生。不知不覺，哩間Café已經陪伴咗香港人九年，亦可以話係陪伴咗我哩個八十後最黃金嘅時期。前排得悉旺角白布街總店即將跟港人道別，的確有點可惜同不捨，令我同老公想再次光臨，回味返昔日喺HeSheEat嘅時光。本身想去旺角總店，但因為荃灣比較方便住喺屯門嘅我同老公，於是我哋決定轉陣到綠楊坊。上一次嚟HeSheEat已經係疫情前。好開心今晚再次嚟到，更開心係被安排到「VIP情侶座」。本身店內粉紅色嘅牆身同梳化已經好有少女情懷，VIP情侶座簡直係令人搵返初戀拍拖嘅感覺，十分甜蜜蜜💕。1️⃣ 黑松露薯條 $52超愛！我同老公都食到停唔到口！薯條好新鮮高質，熱辣辣，香噴噴，脆卜卜，好香口！點上味道香濃嘅黑松露醬，簡直係完美配搭！ 2️⃣ 火辣墨魚汁意粉配辣肉腸 $78墨魚汁好香，加入檸檬汁味道更鮮更開胃。我同老公都係嗜辣之人，我哋都異口同聲話「如果可以選擇辣度就好了」。另外特別欣賞意粉嘅口感，時間控制得啱啱好，煮到al dente嘅質感，彈牙有嚼勁。正！ 3️⃣ 芝士汁鮮蛋意大利麵配白菌煙腩肉溫泉蛋 $85第一次食鮮蛋意大利麵，口感同意粉好唔同，質感比較軟淋，有少少似伊麵。芝士汁濃郁，當中配有薄片芝士，加上溫泉蛋黃，汁變得更滑更濃稠。 4️⃣ 凍紫薯鮮奶 $40鮮奶加上忌廉，真係邪惡得嚟令人難以抗拒。鮮奶味香，甜度適中。但略嫌忌廉唔夠滑同紫薯味唔夠，如果可以加入少少紫薯蓉或麻薯嘅話會更好。 5️⃣ 楓樹糖漿梳乎厘班戟$78要預早少少落單，因為製作需時。不過美味嘅甜品係值得等待的。梳乎厘蛋味香濃，口感鬆軟，空氣感十足，加上清甜嘅楓樹糖漿真係味蕾也被感動。下次想試麻糬熱香餅，今日太飽試唔到，有點可惜，已相約老公下個月再光臨！
