離開美山聖地後，肥仔老友就話繼續車我去下一個目的地 — 會安。 由於美山與會安相距只有大約35-40分鐘車程，所以行程基本上都會選擇上午遊美山，下午去會安，咁就可以最節省時間啦。 而且入夜後既會安古城非常迷人，所以大多數人都會選擇夜遊會安。 因為一大朝早淨係食得個自助早餐，仲要行足兩個鐘頭美山後都未曾食過野。於是喺離開美山時，就向肥仔個老友表示肚仔餓，而肥仔老友就笑笑口咁同我講「Ok, but not here」，又話可以帶我去會安又食又玩。 聽到佢咁講，我心入面都淆一淆，心諗明明我肚餓都唔比我喺美山食野先﹖又要去到會安又食又玩﹖ 但我喺峴港，人都唔識多個，字又唔識多隻，喺無得Say No既情況下，只好繼續跟佢上路。 之後肥仔老友車到我黎到會安古城一帶，我心諗終於有得食野喇。但佢又話「Not here, wait」，我把口就答「OK」，但個心喺度諗「吓，仲未食得」。 肥仔老友揸多大約10分鐘，去到一個近郊位置，終於肯停車，講左句「Follow me」，就帶到我黎呢度。我見到門口個牌，終於放下心頭大石，心諗：你早響話帶我去玩Basket Boat la! 於是，喺咁突然既情況下，我就毫無心理準備下獻出左我喺越南既第一次Basket Boat之旅。 玩之前，好彩都有得食野先。 上圖呢塊野，食落幾好食。但原諒我食完都唔知係咩黎，淨係知佢脆脆地，同埋個醬汁好似辣椒豉油。 無錯，又係越南海鮮炒麵 (琴晚先食完黎)。 醫飽個肚後，就坐上籃子出發。 塞車你就見得多，塞船你又見過未﹖ 無戴過越南帽又點算黎過越南！(記得著埋件救生衣) 沿途有表演睇！ 點擊圖片放大 +4 仲有禮物收！ 點擊圖片放大 去到河流與大海既交匯點，又係時候要折返，準備回航啦。 Basket Boat之旅大約30分鐘，全程有當地船家幫你撐船。如果大家唔怕辛苦既，都可以自己拎起支槳慢慢撐，睇下河邊沿途兩岸風光，都係一種風味及難忘既峴港限定。 是次籃子船遊覽連膳食，合共VND380,000 (約HK$130)。 一場黎到，唔係唔試下嘛。
