喺12月頭既時候，我孤身一人，得個背囊既情況下乘坐香港快運航空前往越南峴港。 我搭嗰班係下午黃昏時段既航機，唔知係咪因為太晏既關係，班機大概有3份1吉位。而用左大約兩個鐘航程，就準時到達峴港既新機場。 落左機，就急急腳咁行去“VISA ON ARRIVAL”櫃枱搞埋張落地簽證，由於事前已經準備好晒所需文件 (前文已經介紹過有關程序)，一去到櫃枱就可以交齊晒野，乖乖地等叫名。唔知係咪其他人已經喺香港搞掂張越南簽證，個櫃枱附近一直都係得幾個遊客企喺度等，從未見過人龍出現過。咁等左大約15分鐘左右，就聽到自己個名 (因為今次係我第一次黎越南，所以都唔知15分鐘係叫快定慢)。交晒錢，拎埋本護照後，就行向右手邊無人排隊既入境櫃枱入境峴港啦。 喺機場買埋電話咭，唱左少少錢之後 (其實都有成百幾萬越南盾)，就準備去酒店CHECK IN。 當我企喺找換店外諗緊點去酒店時，就有個越南肥仔 (佢唔係的士司機黎，類似係揸Uber既)走過黎問 “Sir , Car？＂我之後比酒店名佢睇，佢開我價話USD9，我同佢講USD6，佢就話因為呢程要額外比機場出入$，所以最平只可以USD8 (而佢最終收左我VND180,000，約HK$61) 。 事後諗返，發現應該比佢收多左錢，因為我最尾一日由市中心去機場，的士跳錶連額外機場出入$都係收我VND80,000，無理由去My Khe Beach附近會多收成VND100,000掛。雖然計返港紙都係多收左大約三十零蚊，同埋我都有做得唔啱既地方 (因為我唔知價，就唔應該為左貪方便，反而應該問多幾個司機價錢先或者唔好上車住)，但呢件事反映大家喺峴港遇上當地人都要小心。同埋大家言語不通，其實好多對話都係靠估同Google Translate。 去到酒店後，好彩個越南肥仔都算有良心 (而家諗返起都仲咁覺得)。佢知我想喺酒店再Money exchange時，就同我講“Not Good, follow me" (事後真係發現酒店個兌換價仲低過機場)。之後佢就車我去粉紅教堂後一條街既金舖唱錢 (咁個價又真係呢4日所見最高wo)，之後佢再車返我返酒店，仲同我講“Free" (今轉真係無收我任何車錢)。喺呢個時候，由於人在異鄉，人生路不熟，喺受到一個剛剛認識既肥仔恩惠下，我決定信任佢，就大膽提出"Do you free tommorrow"，可惜佢話“No"，喺我失望之際，佢再補多句"But my friend is ok" (事後諗返，佢會唔會真係當我係水魚咁劏呢)。同佢傾好聽日包車價錢 (全日無限時間去美山聖地+會安，收VND1,300,000)同交換Line後，肥仔就離開左 (我之後亦都無再見過佢了)。 我第一晚住嗰間酒店叫Gold Hotel III Da Nang，呢間酒店位處峴港著名景點My Khe Beach附近 (其實My Khe Beach條海岸線勁長，附近一帶亦有勁多酒店可以揀)。 其實喺峴港，酒店既價錢係可以用超值黎形容，呢間房住一晚連稅包埋早餐都係講緊VND489,000 (大約HK$166)。 喺峴港既第一晚，周圍雖然已經“黑媽媽”，但單拖既我為左醫肚，雖然有少許淆底，但都要外出搵食。 但喺峴港既初夜，我完成明白咩叫搵食艱難。今趟一心黎食越南野，諗住住喺景點My Khe Beach附近會“醫食無憂”，結果發現不似預期，原來夜晚附近D餐廳已經收晒工，甚至連便利店、超市都唔多間。所以奉勸有興趣黎既朋友，想夜晚一落樓就搵到食，相信最好就要住返市中心一帶。 最終行左兩三條街 (唔好以為好近。認真! 尤其係喺峴港，原來想過一條馬路，真係要拎條命出黎搏嫁)，終於搵到餐廳食野既地方 (呢度其實好似係大排檔先啱)。 點擊圖片放大 +2 上圖就係BBQ魷魚，但唔知點解好似中左幅射咁，而味道亦都唔多啱我口味。 我峴港既第一餐，就盛惠VND230,000 (約HK$78)。今餐令我發現當地人煮野勁鍾意炒同BBQ。如果各位黎到，記得小心熱氣。 小弟第一日峴港遊．完
