包車遊 今次始終係自己一個人第一次去東南亞發展中地區，加上大家語言不同，難以溝通，變成議價能力極低，我都預左價錢方面要比多少少。好彩喺旅程第二日遇上一名越南華僑導遊王莉 WeChat ID: vuongloi0912090023，傾開計知道佢而家喺峴港做Local Tour同出租包車服務 (仲可以身兼導遊，但需提早預約)，佢既顧客對象主要為華人，唔駛講都知佢既優點係大家起碼能作正常廣東話溝通 (想買野、食野、去邊都唔駛好似我同當地越南人咁雞同鴨講)。而價錢方面，我將王女士同當地越南既司機作比較，發現起碼平接近15%以上咁多 (雖然我都覺得車我嗰個越南司機服務唔差，但弊在溝通唔到，講咩都淨係識笑)。喺比較過雙方價錢同考慮溝通能力呢兩方面 (特別係可以慳到錢既原因下)，結果我身體非常誠實，好快就揀左王女士。 如果各位即將會去峴港，而又好似我咁白紙一張，出發前咩人都唔識，又唔想比當地司機坐地起價，我誠意推薦王女士比各位考慮。大家出發前可先向王莉WeChat ID: vuongloi0912090023 查詢Local Tour或淨包車報價，就算最終覺得唔合適，都起碼叫做可以多一個選擇比自己揀過下。 上圖係當地越南司機比我既包車價目表，大家不妨可以格一格價，作為參考。而我比較過王女士提出既價錢，差唔多平左15% 如果唔鍾意包車遊名勝，亦都有另一個選擇分享比各位，就係租電單車，一日租車費為USD7 (油錢自行支付)，無須國際駕駛執照，只靠自己手上既電話作GPS。但自己親眼所見，峴港既馬路情況混亂，險象橫生，毫無規矩、秩序可言，人車爭路問題嚴重。普通行人過條馬路都好似打仗咁衝先過到，所以自問有經驗及膽大人士，先好選擇自行租電單車。 12月既峴港天氣 個天長期一片灰濛濛，天陰陰咁；會不定時下毛毛細雨，出街要帶定遮；氣溫接近20-25度，難以進行戶外水上活動；可帶備薄外套、風褸等，在夜晚時穿著。 如果去巴拿山既朋友，因上高山，氣溫會下降，務必帶定外套及遮。巴拿山上真係又濕又凍嫁。 電話咭 喺峴港新機場通過左入境櫃枱直至行李輸送帶位置一帶，會有5-6檔賣當地電話咭既櫃枱。1-3日價錢係USD4；4-7日價錢為USD5 (美金同越南盾都可以使用)。購買時，各位只要將部手機拎比店員，佢就會一手一腳幫你搞掂。雖然佢聲稱4G任用，但我部電話都係長期顯示為3G (不過又真係無限數據既)。 去峴港既朋友最好喺度買張咭即開即用，一來係可以即時啟用Google Map，唔敢話會保證各位唔會蕩失路，但最起碼知道自己去左邊；第二，因為當地人既英語能力不佳，溝通不能。如果能用Google Translate會方便溝通，雞同鴨講情況會無咁嚴重lo (我可以同個司機簡單溝通都係全靠佢)。但重申多次，只係無咁嚴重，但情況都非常惡劣下。第三，如果諗住唔喺機場買，想出去市區先買既朋友，我想同你地講我自己4日3夜都未曾喺市中心見過賣電話咭既舖頭 (可能有機會係我睇漏睇錯)。但我就覺得喺機場度早買早享受，起碼買到個安心先，同埋價錢相信都唔會差得太遠。 峴港之旅．可以正式開始
