上回提到點樣搞掂張越南簽證，而喺越南峴港另一個大家要面對既問題就係點唱$$$ 基本上喺越南峴港接受既貨幣只有美金同越南盾兩種，美金只限高級場所收取，而越南盾就成為日常生活中最常使用同接觸到既貨幣。 而喺唱錢方面，唔好以為拎住美金唱越南盾就得，如果想兌換率最佳，其實都好講技巧。因為唔同面值既美金個兌換率都會唔同，越大面值美金 (即USD100)個兌換率係最高。我當日見USD100 = VND2,272,000，而USD50 = VND1,132,000，即係1張USD100個兌換率係會比2張USD50既匯率更佳。大家喺準備美金時就要留意。 唱錢方法，就有四種渠道。1.機場既找換店 2.酒店 3.金舖 4.ATM 而家就用我既親身經驗講解下各種方法既利弊 1. 機場既找換店 其實喺機場室內範圍，我係搵唔到一間找換店既。而一出左機場玻璃門出口到室外，向左面行，先會見到有大約3間找換店。 呢度既兌換率一定無峴港市中心既金舖咁高，但勝在夠方便，適合啱啱落機而又未有越南盾喺手既朋友仔唱住小量傍身救命用。另外，除左機場範圍，我未喺市中心見過一間找換店。 2. 酒店 並不推介大家喺酒店兌換，因為兌換率比機場既找換店更低，而且反正已經出到市區範圍，其實大把地方選擇唱錢。 3. 金舖 呢個真心推介! 其實喺峴港市都有唔少金舖，當大家仲諗緊去邊區金舖兌既時候，其實峴港市中心著名景點峴港大聖堂 (即遊客必去既粉紅教堂)行往Han Market方向既嗰一條街，已經有多間金舖，只要同個司機講聲喺嗰度放低你一陣就即刻唱到錢。而且我係大約越南時間夜晚7點幾去都仲開門做緊生意，唔怕佢地好早收工。至於揀邊間金舖唱錢我就睇過個價唔會差得太多，大家可以唔洗花太多時間去四圍問價。 4. ATM(自動櫃員機) 呢個方法我就未試過 (因為我無申請海外提取服務，加上我去旅行唔會帶咭)。但適合唔鍾意帶大量現金出門既旅遊人士，唔駛拎住現金四圍走 (始終喺當地人生路不熟，加上係去東南亞地區)。但可能會收返手續費 (視乎銀行而定)，而且兌換率唔一定好。 而流通既越南盾當中，大多為紙幣，最大面值紙幣係講緊VND500,000，我就整左個大約匯率對照表出黎比大家參考下 (個表係以我當日喺峴港既兌換率來計算) VND500,000 = HK$171 VND200,000 = HK$68 VND100,000 = HK$34 VND50,000 = HK$17.1 VND20,000 = HK$6.8 VND10,000 = HK$3.4 VND5,000 = HK$1.7 VND2,000 = HK$0.7 VND1,000 = HK$0.3 如果大家想再簡單D，其實可以唔理佢面額最後嗰三個0數，之後再除以3，咁就可以用最快時間計個大約數出黎喇。就好似VND500,000，大家先將佢睇成500，之後再除以3，即約166，其實同實際個匯率價唔差得太遠，大家就可以心中有數，唔駛下下都襟爛個計數機先知道用左港紙幾多錢啦。同埋搭的士時，佢個咪錶亦係會自動刪減左尾數嗰三個0。例如咪錶顯示68，即係VND68,000，如此類推。 喺度我比個概念大家先，喺越南峴港街邊，食一碗湯河係講緊VND40,000(大約HK$14)；而巴拿山既入場費係VND650,000(大約HK$223)，所以一日行程用百幾萬越南盾其實係基本野黎。 提提大家先，由於越南盾面值大，搞到經常要袋住過百萬越南盾周圍走，個銀包會一大疊錢脹卜卜。而喺比錢同找錢時又要花時間數錢，情況係會極度手忙腳亂同唔方便既。
