雖然一大朝早就喺個小島上，但唔好以為會無啖好食。大分縣觀光協會非常細心，一早就喺島上一間餐廳訂定枱，為我準備一餐豐富既午膳。 究竟食咩東東﹖喺島上行到好肚餓既我非常期待。 話雖如此，但由於島上的小路眾多，道路九曲十三彎，搵食都需要花D時間。 經過明查暗訪，終於到左開餐既地方喇！ 呢間餐廳有咩野食咁出名？講左咁耐，話明保戸島係一個傳統漁村海港，咁緊係食最新鮮既魚啦。 但喺介紹野食之前，都要比大家知間餐廳有咩咁巴閉！ 大家都睇得出呢支錦旗唔少野，無須多講，就知今次大分縣觀光協會無介紹錯嗱。 由於島上每日都有漁船出海捕魚，所以據老闆娘所講 (再次面對言語不通，但好彩佢識少少簡單英文)，呢度既食材都係即日送回島上，係最新鮮既。過程中並無經過冷藏，所以唔會有雪味。所謂既「鮮」味，應該就係咁解。 仲有，老闆娘話呢餐名符其實係鮪魚宴 (即大家叫開既吞拿鱼)，會食盡鮪魚可食既所有部位，包括心臟 (我都係第一次聽過)、魚鰭、魚胃、魚腸等等等等，唔會浪費 (我聽完都呆左一呆，心諗係咪我理解錯左)。 結果，一上菜，就知老闆娘所言非虛。 點擊圖片放大 +5 雖然有好多鮪魚既部位都係第一次放入口，但堅．好食，果然係好一餐「全鮪宴」。 一間好既餐廳，除左有好味既食物外，店內環境亦都好重要。 在店內既一扇窗，就可飽覽保戸島海景，以美景為伴。 食過一餐風味既鮪魚宴，又要離開及準備前往下一個旅程。 一餐好既料理，並不只能靠把口去細味，仲要用心去感受。 「小料理 大川」 預約電話﹕0972-87-2024 (最少要2日前預約) 想獲更多有關資訊，可瀏覽 http://www.oitasima.net/hotojima/index.html
