一大朝早，再次揸車出發體驗之旅。 今日既目的地係 — 保戸島。 保戸島??可能大家都未曾聽過。咁我都重申一次，我黎大分之旅前係同大家一樣聽都未聽過。所以今次我去完後，我估自己應該係首批香港人介紹依個名不經傳既小島比大家認識。 由大分市出發，揸車需時約45分鐘便到津久見港。大家可能會覺得好奇怪，明明話去保戸島，點解又會走左個津久見港出黎? 因為要去保戸島，淨係靠揸車係未夠既，仲要搭埋船先得。揸車只能揸到去津久見港 (放心，津久見港隔離已經提供埋免費泊車位比大家)，之後買好船飛 (單程收費：大人860 YEN，小童430 YEN)，就可以留喺休息室靜待上船。 記得喺休息室拎返份地圖旁身，一陣上島可以睇。 P.S. 各位要去既時候要特別留意，由於去保戸峊既船班次非常疏落，往同返都係約2-3小時先有一班船，時間管理方面要小心小心。 時間啱啱好，可以上船出島啦! 點擊圖片放大 呢程船大約25分鐘。雖然得25分鐘，但我嗰日搭E程船都見到個海幾大浪下，感覺到幾拋，有少少玩海盜船FEEL，易暈船浪朋友務必注意。 喺架船上所見，除左見到應該係島上居民既人外，就係著住行山裝束既日本人 (原來有日本人會特登上島行山)，而海外遊客人數係零 (果然名不經傳)。 經過25分鐘船程，平安落船。 喺保戸島碼頭，首先歡迎我既，竟然係兩隻可愛貓仔。 漁村海港 — 依個係我落船既第一感覺。E度同香港既坪洲感覺相似，更可能比坪洲更零靜。 第二種感覺，島上好大風。你無論喺咩位置，都會有風追住你。上島前，就算你點SET好個頭，包你個髮型最後一定散晒。 第三種感覺，我肯定E度船既數量係多過汽車。 用左45分鐘時間四周逛逛、影下相。 點擊圖片放大 +2 仲特登上左山腰附近參觀 — 加茂神社 (被島上居民稱為保戸島既守護神) 目測所見，島上差唔多九成人都係60歲以上既老人家。但佢地見到咁而生面口既陌生人 (即係我^^)，都無一種好奇異既目光同反應，只會同我點點頭，報以一個微笑。 好坦白咁講，E度渺無人煙、無得比你瘋狂購物，無得比大家掃街任食，若果你去旅行係追求咁樣，我敢講E度肯定唔適合你黎。E度只係一個好平淡既小島，但往往平淡就是福。當你見識過出面城市既繁囂、急促既節奏，抖不過氣既壓力，你就會明白喺小島上既寧靜同舒服，幸福既感覺，係用幾多錢都買唔到既。 待續
