繼續踏上旅途，向下一個目的地 — 豐後大野市進發。 重申多一次，喺今次黎大分前，我對大分嘅認識真係只限由布院同別府。唔係上網做過功課，都唔知原來大分仲有咁多咁正既地方。 咁點解要黎豐後大野市？就係為左一睹有日本版嘅尼加拉瓜大瀑布之稱既原尻の滝。 做個少少介紹先，原尻の滝高約20米，闊約100米，被列為「日本瀑布100選」之一既著名瀑布。 想喺大分睇瀑布，由大分市揸車出發其實只需一個鐘頭多少少。同埋原尻の滝方便到提供埋免費停車場俾你，你只需要泊好架車後，行三分鐘都唔駛，成個瀑布就會放係你眼前。 提提想黎既朋友仔，其實呢個瀑布附近仲有幾個名勝，就好似岡城跡同埋扇森稻荷神社（我之後會再作介紹）其實都係喺附近一帶。只要事前做好準備，用半日時間就可以睇晒幾個景點，超方便！同埋千祈唔好低估秋、冬天時間日落既速度 (溫馨提示：喺日本秋、冬天時間，下午五點未夠個天就已經黑晒，我就係咁樣失左預算，變左要分開兩日黎參觀附近景點，晒左時間)。 泊好架車後一落車，轟隆轟隆、連綿不絕嘅水聲已經係耳邊出現，誇張到唔使望幅地圖都知道邊個方向係瀑布。咁事不宜遲，一於向瀑布進發。 點擊圖片放大 沿途仲有紅葉做襯托，正! 第一眼望到E個瀑布，只能夠用壯觀黎形容。 自問膽大嘅朋友，仲可以邊行木橋「滝見橋」，邊欣賞瀑布嘅風光。 點擊圖片放大 嫌睇瀑布睇得唔夠近？其實仲可以行小路落去石澗近距離觀看感受更多。 點擊圖片放大 望住眼前既一切，不禁驚嘆大自然既奧妙，亦慶幸自己有機會親眼目睹此情此景。 一句總結，原尻の滝值得一看。
