一早起身，喺酒店食完個自助早餐，就要出發去佐伯市。 佐伯市，其實我喺黎之前聽都未聽過，但由於受到邀請作體驗之旅，所以終於有機會一黎呢度。 唔講都唔知，原來佐伯市附近有漁村港口，海產特別聞名，正所謂靠山食山，靠海就食海。所以喺大分市山長水遠黎依度就係為咗食最新鮮既海鮮。 講左咁耐，今次黎其實係搞咩東東？今次嘅體驗就係嘗試親手即開即食海膽。 海膽可能你食得多，但你試過自己一手一腳親手開、親手洗、親手食未？今次一於：飛雲！機會嚟喇！ 經過個半鐘嘅車程，終於由大分市黎到佐伯市蒲江西野浦。嚟到依度，感覺非常似大澳，我喺E度見船仲多過見車，就知道漁村海港並非浪得虛名。 今次黎既目的地就係 有限会社 丸二水產 大分縣佐伯市蒲江大字西野浦2643番地 預約電話：0972-42-1600 點擊圖片放大 一入到黎，見櫈都冇張，淨係得兩張枱，同埋個向海無敵大魚排，心諗自己係咪去錯地方？正當疑惑嘅時候，係我面前就出現咗一個戴黃色帽嘅女士。由於言語不通嘅問題，基本上我聽唔明佢講乜，佢又聽唔明我講乜，大家淨係識笑。之後佢就去拎咗套衫、一大盤海膽同埋工具出嚟，我心諗：咩事啊！ 佢之後就比左張卡片我，我望一望，原來依位女士叫 橋本正惠 喺呢度丸二水産同民宿旅館まるに丸既負責人，今日嘅活動就係由佢教我地點樣親手即開即食海膽初體驗。 真心講句，黎之前淨係知道呢度係食海膽，但從來都諗過原來係自己親手即開即食。咁大個仔都未試過咁樣，一場黎到就梗係要試吓啦。 著好套拆海膽戰衣，帶埋對手套就即刻開工 面對一大籮海膽，起初真係無從入手。雖然大家係雞同鴨講，但得到橋本女士非常有耐性同鍥而不捨既教路之後，我終於可以踏出第一步。原來由點樣拆開舊海膽，到刮海膽肉出黎工序都一絲不苟。 點擊圖片放大 最後我哋終於逐隻擊破，將海膽們煎皮拆骨。 縱使大家言語不通，但親身所感受到既濃厚人情味及熱情對待卻最真實。 大分縣佐伯市海膽體驗之旅 待續
