向來，首爾被稱為男士既地獄。 黎得首爾，女士們 (或被尊稱為戰士們)都會長期處於戰鬥、抗奮既狀態，亦可引證咩叫財散人安樂。 喺戰場方面，除左主戰場明洞、東大門外，首爾各地每日亦有好多地方發生緊寧碎戰爭，是旦揀條地下購物街都夠開火半日 (男士們只可以苦唱﹕晴天、陰天、雨天，你在何地)。周街都係賣化妝品、護膚品、飾物、時裝等等等等既舖頭，無論你係阿豬媽定小豬媽，都會搵到你啱既戰場。 講左咁耐，男士們又應該如何自我救贖呢? 除左不斷學習分辨人造人系列，選擇乖乖企喺店舖門口等，又或者入周街都係既CAFÉ坐下HEA下，其實都仲有得揀。 知道會黎首爾，我都好醒目咁搵下有咩地方自己啱去。除左搵飲搵食外，上網搵搵下，就見到弘大有間ONE PIECE CAFÉ，咁行程上當然要即刻做手腳配合下啦。 當日，終於親眼目擊。一行到入口，「千陽號」架船就喺我眼前，有成2層樓高，本著「打咭是必須」的精神，我都無放過呢個機會，無限放題。(但有心理預備，條街人來人往，想單獨影張無人遠景相都隨時等到你忟) 既然遠景影得咁辛苦，咪影近景囉。大家可以喺船身甲板上任影唔嬲，呢D機會，留喺香港既粉絲們真係得個恨字。影完相，為照顧各位未滿足粉絲既需要，呢度當然有紀念品區，不論模型、公仔，甚至衣服都有，粉絲包保可以荷包大出血。(提提你，好多網站推介既惡魔果實蛋糕我就不願置評啦，只可以話好睇唔代表好食，但影下相又無妨既) Café de One Piece 地址：마포구 와우산로 23길 101 營業時間：10:00am-10:00pm 各位盡責既男士們話仲未夠喉? 咁咪帶埋另一半影相留倩影囉。 打咭位唔想來來去去都係來自星星的南山塔、著韓服的光化門，其實都仲有得揀。 今次介紹既係藍色貨櫃屋 COMMON GROUND，建國大學站下車喺6號出口，一路直行，大約行3-5分鐘即到。 未入到去，就已經比一堆藍色大貨櫃嚇親 (明明新界都大把貨櫃場，點解效果差咁遠)。整個商場由200個貨櫃建成，所以在搶眼的彩藍貨櫃上寫了1﹣200的白色數字以示識別號碼，各位可揀對自己有獨特意義既貨櫃盡情相片放題。 貨櫃商場有咩睇、有咩買、有咩食，我相信我唔係第一個人講，亦唔會係最後一個人寫，所以都唔選擇多提。今次寫篇野出黎只希望幫到大家喺行程上唔駛千篇一律，想提供多個地點比大家去遊歷， 感受一下新．首爾。
