打卡年代，去旅行影放閃相，是常識吧？以下獨家傳授三招，慳錢、慳力、慳時間「佛系攝影法」，希望人人旅行，都輕鬆拍下「此刻無價」！ 1/ 多用Time Lapse Selfie 得多，表情漸漸一式一樣，要故作自然、扮不經意，有時又尷尬唔入戲。我的解決方法是，用Time Lapse 模式自拍。 Time Lapse是什麼？ Time Lapse（縮時拍攝）模式，即是每隔數秒，相機自動拍一張相。例如，我在無人沙灘自拍逍遙「游」，設定相機至每隔兩秒，照相一次的縮時攝影模式。然後，我任由相機向著自己照相，游水又好，玩浪也好，連拍1分鐘，好容易就忘記了相機的存在，流露出自然的表情。 1分鐘，捕獲到30張相，總有一張，甚至好幾張，表情自然、構圖出色、有mood 有感覺的 profile picture！運用 Time Lapse 的好處，尤如「佛系」捕魚，set 好天羅地網，自動波去捕捉最美一刻，任時間流逝，再「坐享其成」。 再者，最大好處是，你手上的攝影器材，好大機會已經內置 Time Lapse 功能，無需額外購買任何儀器，慳返荷包食餐好嘅！ 2/ 自拍棍、腳架，或取代方法 玩Time Lapse 會上癮，上癮自不然想 upgrade 個「捕獸器」！加返支神棍、迷你三腳架，可以隨時隨地拍，「收穫」肯定更加豐富。我習慣去深水埗購買攝影配件，通常HKD$100有找，甚至HKD$20都有交易。雖然無牌子，但價廉物美，就算去旅行粗心大意，粗帶粗用，整壞都無咁心痛。 如果想再慳錢、慳力、慳時間，連神棍、腳架都懶得買、懶得拎，旅行時，可以用背包，固定相機位置，或者份外留意周圍四平八穩「現成工具」，例如餐桌、石壆、紙巾盒、水壺之類，咁就唔止低成本，直頭係零成本，而且「一身輕」！ 3/ 廣角鏡頭 有時候，不是我們學藝未精，拍攝技術差，而係鏡頭本身唔夠 wide，先天不足，肉眼看見再美的風景，鏡頭總是無法反映現實的澎湃！ 要拍出震撼的旅行相片，天人合一、大地在我腳下，購買手機／相機時，要特別留意鏡頭的焦距。我本身最愛用超廣角的GoPro拍攝旅行相片，不用太分神兼顧對焦、構圖。自拍時，亦唔駛擔心自己得返「半邊面」！ 我熱愛攝影，但不追求一出新款就買，因為「以有涯隨無涯，殆已！」。倒不如，做個「佛系」背遊攝影人，既留住最美回憶，又及時享受當下，眼前的瞬間。 作者： 廚職背遊 梁芷靈 廚職背遊 460日：何文田坐車到新加坡、德國工作假期、希臘坐車返香港、西伯利亞鐵路。《經濟通》DIVA Channel、《gini》智能理財平台專欄作者。曾赴英國留學、英國廣播公司工作。下個計劃：去英國做老闆！ 更多旅遊慳錢小貼士： 【慳錢攻略】背包達人話您知：3大廉航 窮遊歐洲抵到笑 【 慳錢攻略】歐遊一定食到窮？推介 3種慳錢食法 【精打細算】歐遊唔一定貴！倫敦3個免費must-go靚景點
