有一日，我喺富昌邨的麥當勞，見到隔離坐住一位差唔多八十歲嘅婆婆。婆婆攞住部電話，講得非常激動。收線之後，佢眼濕濕，個樣好難過。我坐喺隔離，忍唔住問候佢：「婆婆，發生咩事呀？」原來，電話係佢個仔由英國打返嚟。婆婆話，自己等咗好耐，先等到個仔一個電話；點知傾唔夠幾句，兩母子又因為一啲事情爭拗。對個仔嚟講，可能只係一通唔太愉快嘅電話；但對婆婆嚟講，呢個可能係佢期待咗好多日，甚至好多個星期嘅一次聯絡。嗰一刻，我開始諗：香港仲有幾多老人家，都係咁樣等緊一個電話？問完AI，原來香港65歲或以上人口已經超過178萬。當中接近30%都係獨居長者，又有幾多長者長期感到孤單呢？我只可以講婆婆嘅經歷並唔罕見。香港係一個步伐非常急速嘅城市。當父母踏入七老八十，仔女好多時亦正值三十至五十歲：上有高堂，下有仔女，仲要處理工作、家庭同生活壓力。唔係大家唔愛父母，而係每日需要兼顧嘅事情實在太多。好多時，心裏面明明記掛住，但一句簡單嘅「今日食咗飯未？」、「琴晚瞓得好唔好？」最後都因為太忙而冇問出口。喺我眼中，社會問題亦可能係創業機會。如果我哋能夠真正理解一群人嘅需要，再提供一個安全、可靠，而且有人願意使用同付費嘅解決方案，創造社會價值同創造經濟價值，其實可以同時發生。所以，我今次想用30日驗證嘅創業項目，就係一項面向長者嘅AI語音關懷服務——暫名叫做「問聲好」。聽到「AI語音服務」，你可能會問：呢啲項目聽落涉及人工智能、電話系統、廣東話對話同私隱保障，真係一間OPC一人公司可以開始做嘅咩？我嘅答案係：一個人未必能夠即刻營運一項成熟服務，但一個人絕對可以先做出原型，然後用最低成本驗證市場係咪真係有需要。今日嘅創辦人可以運用ChatGpt同其他AI工具，建立一套由多個AI智能體組成嘅工作流程。佢哋唔係真正嘅員工，但可以分別協助做市場研究、可行性分析、產品設計、程式開發、內容創作同風險檢查。以前可能要一個小團隊先可以開始嘅項目，今日一個識得提出問題、核實答案同作出決定嘅創業者，已經有機會踏出第一步。咁我究竟需要啲乜，先可以開始「問聲好」？一部Mac、一部電話、一支咪——硬件上，可能就係咁多。但真正重要嘅，仲有電話系統、AI工作流程、長者同家屬嘅同意、個人資料保障，以及遇到特殊情況時點樣轉交真人跟進。具體點樣做、30日內要完成啲乜，以及我會用咩標準判定項目繼續定停止，請持續關注。最後我想問今日您打左俾父母未？請在評論區留言。
