小朋友學業繁忙，放學翻屋企做完功課又要溫默書，放假又要去上興趣班～「SportsHour 中小學生運動參與時數研究計劃」入面發現全港九成半中小學生運動量嚴重不足。由此可見，香港學生嘅運動習慣非常不足。不少家長覺得做運動只係對身體好，但係學業更加緊要，仲點會得閒做運動。但係原來運動仲可以提升其他能力，你又知唔知呢？今日就由小君子帶你認識運動對生理以外嘅幾個優點啦！1. 調節情緒根據「香港小學生抑鬱狀況調查 2018」，每５名小學生就有１名學生有抑鬱問題，香港學童情緒問題可見一斑。運動過程中，大腦會釋放安多酚，不但可以舒緩壓力，仲可以提供愉悅嘅感覺，所以運動一直以嚟都係舒緩抑鬱症狀嘅好方法！ 2. 提升自尊感自尊感對小朋友嘅人格發展十分重要。自尊感係小朋友自我肯定嘅源頭，缺乏自尊感嘅小朋友唔單止會欠缺自信，人際溝通能力亦會有所下降。英國運動醫學年刊2005年版發表嘅一篇研究報告入面提出，小朋友係可以有效咁提升自尊感。只要小朋友運動時，透過訂立唔同嘅小目標，喺達至目標嘅過程中就可以建立自尊感，長遠而言，仲咁建立更堅毅、更具自信同埋積極嘅人格。 3. 提升專注力 「做完運動人都散晒，仲點做野啊。」對成年人黎講可能係咁，但係原來對小朋友並唔係喎！瑞典卡爾斯塔德大學研究團隊喺2005發佈一篇論文，文章入面指出小朋友喺連續4週嘅有規律運動過後，可以提升專注力及課堂表現！ 睇到呢到，運動對小朋友仲係一個「嘥時間」嘅活動？「運動做得好，讀書冇煩惱！」仲唔快啲把握小朋友嘅黃金學習時間，帶佢地去接觸唔同嘅運動，幫助佢地尋找佢地嘅興趣！參考文獻:Norlander, T., Moås, L., & Archer, T. (2005). Noise and Stress in Primary and Secondary School Children: Noise Reduction and Increased Concentration Ability Through a Short but Regular Exercise and Relaxation Program. School Effectiveness and School Improvement, 16(1), 91–99. https://doi.org/10.1080/092434505000114173Rowland, T. (2006). Can Exercise Improve Self Esteem in Children and Young People? A Systematic Review of Randomised Controlled Trials. Yearbook of Sports Medicine, 2006, 272–273. https://doi.org/10.1016/s0162-0908(08)70434-3 更多小君子推薦文章
