雖然我已有一整個月沒有夢見過星星姐姐；我卻被她之前的說話弄得心緒不寧。 不過慶幸的是，我的生活如常，亦沒有任何去過英國的男人對我有可疑的舉動。 平靜的生活，令我開始懷疑星星姐姐之前是否只在唬弄我… 即使她從沒有騙過我。 在九月尾一個平常的星期四早上，我在畫廊工作時接到舅父仔的電話。 他很少在辦公時間打電話給我，除非有急事。 「姨甥女，救命呀！」電話傳來舅父仔不知所措的聲音。 我心頭一顫，心臟禁不住噗通噗通地跳過不停… 「做乜事呀？你鎮定啲先，慢慢講俾我聽發生咗乜嘢事…」我試圖先安撫他的情緒，令他可以清楚表達我能如何幫到他。 「杜以希，妳今次真係要幫我… 今日我負責嗰篇editorial本來book咗個Gallery影相，點知佢哋突然話臨時有事唔可以借場俾我哋，但係我哋又已經book好晒啲衫，器材同埋model… 如果搞唔掂，我老頂實殺咗我……」他連珠炮發地說。 聽罷他的話，我登時吁了一口氣。 既然能夠用疾風的速度把話清楚說完，就證明他安然無恙。 「咁… 我可以點樣幫到你呢，舅父仔？」我微笑著，因為我已經猜到他想怎麼樣。 「我呢… 如果想借妳間畫廊影相…… 妳估得唔得吖嗱？」他帶點忸怩地問我。 幸好畫廊的客人不多，今天亦沒有特別事，所以和我的老闆岑頌知商量過後，他爽快答允舅父仔的雜誌社來借場拍照。 岑頌知雖然富有，但他暗地裡是一名算死草；所以當他一知道有雜誌來拍照順道宣傳畫廊，他歡迎至極。 大概下午二時左右，舅父仔便和他的同事及模特兒一行十人來到畫廊。 我坐在一旁，看著認真工作時的舅父仔看得出神… 那個在家裡不修邊幅，只愛挖鼻孔和躺在沙發上打機的他，原來可以如此聚精會神地工作。 當他們還在準備拍攝道具和攝影機時，楊一凡忽然來了畫廊。 「一凡，你好少呢個時候嚟㗎喎！」岑頌知和剛到達的楊一凡說。 「嘩！今日畫廊搞乜呀？咁多人嘅？」楊一凡帶點驚訝地問岑頌知。 在旁聽到他們對話的我搭訕道： 「今日有雜誌借場影相呀！」我雀躍地說。 楊一凡環視畫廊一週，記憶力甚好的他突然大聲說： 「以希舅父仔？你都喺度嘅？」他詫異地問。 本來正在和攝影師商討拍攝事宜的舅父仔，轉過頭望向楊一凡… 「你邊位呀？」舅父仔有點不耐煩地問楊一凡。 「我係同以希一齊去英國讀書嗰個文德仔呀！你話你個腦只係用嚟記有用嘅嘢，所以唔記得我係邊個嗰個文德仔呀！」楊一凡語帶挑釁地說。 那是舅父仔在我畫畫比賽得獎那天，曾跟楊一凡說過的話。 聰明的舅父仔聽罷眉頭皺起；明顯地，他已經意識到楊一凡在譏諷他。 「以希，有人嚟借場拍嘢，妳都應該無乜嘢做㗎啦！不如我哋出去食啲嘢再返嚟？我今日忙到飯都未食……」楊一凡對我說。 「但係我已經食咗飯… 你自己去食啦！況且我唔可以掉底徐言同埋老細喺度，自己出去同你食嘢囉…」我搖搖頭說道。 我偷瞄到徐言一直在留意我會否扔下工作和楊一凡外出。面對如此敏感的同事，我當然不可以隨便走掉。 「以希，妳陪一凡出去食啲嘢啦！佢千里迢迢由灣仔嚟中環，都係想搵妳陪佢啫！ 呢度我同徐言搞得掂，唔阻你哋拍拖喇！哈哈哈……」 岑頌知以為自己很「識做」地造就我和楊一凡。 但暗地裡，我最想留在畫廊看著舅父仔工作。 「以希，咁妳想食乜嘢呀？」楊一凡興奮地問我想吃甚麼。 「你話事啦，我都唔肚餓…」我敷衍地說。 當我正準備和楊一凡步出畫廊時，我差點被一個攝影機的腳架絆倒。幸好我身手不算笨拙，巧妙地避過仆倒的命運。 「以希，妳無事嘛？」楊一凡細心地扶著我，詢問我的情況。 「無事！不過話時話… 你好似好耐無因為我PK而取笑我…」 我忽然想起在英國時，他曾經和我有一段稱兄道弟，互相取笑的歲月。 那是我和楊一凡久違了的互動。 「哈哈…… 妳唔講我都唔記得！不過我對妳宜家又點同以前呢？」他含情脈脈地望著我說道。 我一時不知該如何回應他。 忽然，一把浮躁的聲音大喊道： 「麻煩你哋唔好喺度阻住我哋set up吖！唔該晒！」 那是舅父仔的聲音。 我望向舅父仔，見到他頂著一張臭臉忙著整理攝影器材，完全無視我的視線。 大概他要在同事面前表現專業點！所以即使對著我這個姨甥女，他要公事公辦。 我也寧可他是一個認真對待工作的人。 「老細，咁我出去一陣先啦，拜拜！」我向岑頌知交代一下，就跟楊一凡離開了畫廊。 「以希，我好耐無見過妳舅父仔喇！佢好嘛？」楊一凡在餐廳問我。 「都係咁啦！哈哈…」我依舊敷衍地答他。 因為我整個腦也想著舅父仔和他同事在畫廊工作得怎麼了。 「佢宜家做緊雜誌呀？有無拍拖呀？」楊一凡似乎對舅父仔很有興趣。 「係呀，做緊Fashion Reporter… 佢有個拍咗差唔多三年拖嘅女朋友喇，感情好好！」我漫不經心地答。 「佢哋感情咁好，妳唔會唔開心咩唔？」他問。 本來在吃著三文治的我，停止咀嚼，並帶點驚訝地望著楊一凡。 「吓？我會有幾唔開心呀？」我瞪大眼睛問他。 楊一凡見狀，突然笑了出來。 「哈哈… 無，我見妳望住佢個眼神好特別，唔似係一般姨甥女會望住個舅父嘅眼神…」他說。 我心頭一驚… 難道我對舅父仔的特別感情那麼明顯嗎？ 「我同舅父仔由玩到大，感情梗係唔似一般有年齡差嘅兩甥舅啦！」我理直氣壯地答。 「以希，其實妳係唔係鍾意妳舅父？」楊一凡單刀直入地問我。 「哈哈哈哈哈… 有乜嘢可能我會鍾意佢呀？」我用異常誇張的笑聲答他。 「妳喺英國咁多年都無男朋友，就係因為佢？」他繼續尖銳地問。 本來在我臉上的笑容，驟然消失了。 楊一凡好像有透視眼一樣完全看破我的心事；而我也知道我在他面前裝不下去了… 「以希，既然佢都有個咁穩定嘅女朋友，佢哋年紀都開始成熟，遲早都會結婚生仔，咁到時妳點算？」他問。 他的這個問題，我何嘗沒有想過？ 我默不作聲。 「我知我咁講對妳好殘忍，但妳都知道，佢係妳舅父，妳同佢永遠都唔會有可能！」他斬釘截鐵地說。 忽然，我感到雙眼模糊起來，淚水一點一點的滴在我的三文治上… 楊一凡完全戳破了我那費盡全力去隱藏的感情… 並殘酷地要我認清我愛不了最愛的人的事實。 難道要和自己最愛的人相愛，有那麼難嗎？ 電視和電影裡那些「有情人終成眷屬」的橋段都是騙人的嗎？ 「以希，其實我可以代替妳舅父去愛護妳。 妳都知我一路都鍾意妳……」他向我遞上紙巾，對我說。 聽罷，我終於哭出聲來。 「我真係好鍾意妳，我亦唔介意去做任何人嘅substitute；我只係希望有個對妳好嘅機會。」他不徐不疾地說。 我雖然一直在哭，但楊一凡的話我都聽在耳裡。 或許，投入另一個人的懷抱才可以令我完全放棄舅父仔。
