我思索了數天，還是搞不清楚到底唱K那晚我是如何回家的。 於是我今天再打電話給鄧芊行… 她仍然認為是謝以悉送我回家。 「無可能！佢點會知道我住邊？」我在電話問鄧芊行。 「可能妳醉咗，乜都講晒俾人聽呢？」她答。 雖然我不否定這個可能性，而謝以悉也可以從我的袋子內找到我家鎖匙送我返家；但他總不會替我卸妝換衣服吧！ 「其實妳有無親自問過妳個組爸，到底佢當晚有無送我返屋企？」我質問鄧芊行。 「誒… 無呀… 嗰晚之後我都無再喺學校見過佢，咁我又未至於同佢熟到會無啦啦WhatsApp佢…… 不過聽人講，佢好似請咗幾日假。」鄧芊行答我。 請假？難道那晚他宿醉到病了？ 我和鄧芊行掛線後，便開始梳妝，準備去公公的壽宴。 我今天一定要打扮得漂漂亮亮，不可給那個Lillian比下去！ 我和父母到達酒家廂房後，已見到Coco表哥一家以及舅父仔和那個女的在聊天。 「舅父仔，你話買邊隻高達砌好？我諗緊買新安洲定係Banshee好…」我聽到Coco雀躍地問舅父仔。 同時間，我見到那Lillian微笑地坐在舅父仔和Coco旁邊，小鳥依人地挽著舅父仔的手臂。 「梗係新安洲啦！型咁多！」舅父仔起勁地說。 「咦？大家姐，你哋嚟咗喇？」Lillian笑著對剛抵達的我們說。 我心想：佢真係當正自己已經嫁咗俾舅父仔，叫我媽咪做乜鬼大家姐啫？ 「Lillian~ 妳咁早到咗喇？咁有心呀，哈哈哈……」媽媽笑得合不攏咀，看似對Lillian叫她大家姐非常受落。 大概自從上次飲茶後，她已經和我的家人在我不知情的情況下混熟了。 一陣低落感忽然來襲。 「以希，快啲過嚟一齊坐低傾偈！」Lillian向我揚手，示意我坐到他們身邊。 我牽強地笑了笑，為勢所逼地坐到Lillian的旁邊。 「嗨，以希，我終於有機會同妳坐底傾吓偈啦！」Lillian笑著跟我說。 「哦，係囉！哈哈。」我皮笑肉不笑地回答。 「我聽妳舅父仔講你哋兩個由細玩到大… 妳就好喇！可以見證住思銘嘅成長過程… 講真，我有啲妒忌妳。」雖然她表面上親切地對我說這句話，但我感覺到她的那句「妒忌」帶有惡意。 她大可以說「羨慕」我，而非要用「妒忌」這兩個字不可。 無可否認，可以和舅父仔一起成長，正是我現在唯一勝過她的地方。 「咁妳又唔駛妒忌我嘅，反正妳以後可以見證住舅父仔嘅未來。」雖然我揪心地說這句話，但這是我不可否定的事實。 我見她臉上立即泛起一個燦爛的微笑；那是一個勝利者的微笑。 「咁我當妳祝福我同埋妳舅父仔㗎喇！妳對我哋嘅祝福好緊要㗎，係唔係呀，思銘？」Lillian搖了搖舅父仔的手臂，示意他作回應。 本來正在和Coco談話的舅父仔立即把頭轉向Lillian，向她笑了一笑。 然後舅父仔再望向我… 但他只望了我一眼後便避開我的視線… 為何他要避開我？其實自我抵達酒家後，他一眼也沒有看過我… 他有必要在Lillian面前對我那麼避忌嗎？反正我和他只是血濃於水的兩甥舅… 此刻的我，除了扮大方祝福他們，還可以做甚麼？ 整晚的宴會，健談雅爾的Lillian覆蓋了外公的鋒頭，成了眾人的焦點。 各人也稱讚舅父仔選女朋友的眼光一流，想必Lillian將來會是一個好老婆。 舅父仔一臉尷尬，但Lillian卻落落大方地接受眾人的讚美。 我陪笑著，扮作附和大家對Lillian的主流意見；但心裡卻有十萬個不甘。 我已經不奢望可以和舅父仔兩情相悅；我只希望他可以選一個我「認可」的伴侶。 總覺得這個Lillian的「好」是裝出來的；相反，她對我的敵意卻愈來愈明顯。 *** 難道我就找不到另一個可以令我心動的男人？ 自從我知道舅父仔找到女朋友後，便一直在想這個問題。 我認識的異性，除了以前的中學同學和英國的楊一凡及他的朋友，便寥寥無幾。 其實我並不急於找一個人拍拖；我只想找一個人去令我了斷對舅父仔的情感。 我這樣想很自私吧！ 不過「人揀我，我揀人」；伴侶不是我想要就有的。 外公生日後，距離我返英國還有一個多星期。 這段時間我多數賦閒在家，沒有再見過舅父仔。 一天下午，我忽然接到鄧芊行的電話。 「喂喂，杜以希！妳今晚得唔得閒？」她用急促的聲線問我。 「廢話！我梗係得閒啦！」我慵懶地回答。 「我組爸想再約妳食飯呀！」她問。 「組爸」？一說起謝以悉，就令我想起唱K那晚的事。 如果當晚真的是他送我回家，我禮貌上也應向他道謝。 「好呀！幾點邊度食？」我爽快地答應。 「嘩！妳今次咁順攤呀？」鄧芊行有點驚訝。 如是者，我又和謝以悉見面了。 說實話，我和他比我想像中談得來。當然，我不討厭他。 到了約定的日本餐廳，我駭然發現謝以悉已到達，並只訂了一張二人枱。 「鄧芊行呢？」我問謝以悉。 「乜芊行無話妳知，今晚得我同妳食飯咩？」他詫異地問我。 我搖搖頭，示意我甚麼也不知道。 「唔好意思，其實我應該自己約妳；怪就怪我唔夠膽約妳單獨出嚟，要搵芊行幫手。」他搔搔自己的頭，有點不好意思。 「哦…唔緊要！反正你都就快去英國，大家可以交流吓。」我一臉輕鬆地說。 然後我們便開始聊起大家在不同地方讀大學的經驗。聽謝以悉說，香港的大學生活很多姿多彩… 基本上上課是配菜；社交生活才是主菜。 相反，像我這種留學生，學成歸來才是對得起父母供書教學的重點。交朋結友，課餘時間有空才再想吧！ 不過既然香港的大學生活如此精彩；難怪舅父仔會那麼容易交到女友。 開朗低能的舅父仔在大學一定也交到不少好朋友吧！ 「係喎！其實呢…妳…有無…男朋友呀？」吃飯途中，謝以悉唐突地問。 我一時反應不過來，愣住了。 「哈哈哈… 做乜咁問嘅妳？」我扮作不懂他意思地反問他。 「哈哈… 其實我點解會咁問，原因都好明顯。」他的臉紅了。 我的臉也變得滾燙起來；想不到鄧芊行口中的風頭躉會看上我。 的確，雖然我不至於喜歡他；但他不是令我反感的類型。 「我無男朋友。」我如實告訴他。 「不過… 嗰晚唱K… 妳飲醉咗之後係咁問……」他欲言又止。 「我問咩呀？」我的背後涼了一截… 因為我絕對是「酒後吐真言」的代言人。 「誒… 妳係咁話點解妳唔可以鍾意佢…講咗好多次，跟住就係咁喊。」他續說。 我心想：瀨嘢！我無講到舅父仔個名出嚟呀？如果俾鄧芊行知道，後果會很嚴重。 「但係因為妳又無講嗰個人係邊個，所以我先打算問問妳。」他狐疑地說。 我登時吁了一口氣。 「講真，我想問你好耐… 嗰晚係唔係你送我返屋企㗎？」我躊躇地問。 「我嗰晚係打算送妳返屋企，因為見妳飲得咁醉…」 「打算？」我驚覺他用了這兩個字。 「係呀…其實我嗰晚都飲得幾醉，不過見到妳仲醉過我，所以我諗住用意志送妳返尼企。」他說。 「不過落到K房樓下，我仲記得我扶住妳，諗住幫妳截的士… 點知突然唔知發生咗乜嘢事，我就斷咗片…」他續說。 「第二日我發現自己瞓咗喺唱K嗰條街度，手臂仲有幾個瘀痕，好似俾人打咗一身咁… 所以我都請咗幾日假。」他一臉無辜。 我聽罷，除了瞪眼看著他，也不知道可以做甚麼。 那即是說，謝以悉並沒有送我回家。 「不過知道妳嗰日安全返咗屋企我就安樂晒！我今日唔會再由得妳自己一個返屋企咁危險㗎喇！」他抱歉地對我說。 「傻啦，我今日無飲醉，自己都識返屋企。」我禮貌地微笑回答道。 「我都係想見妳耐啲啫！」他衝口而出。 他說罷好像也察覺自己說了些不得了的話，立即以笑遮醜；我也尷尬地笑著。 笑著笑著，我意識到自己的尷尬笑聲正正是我沒有喜歡上謝以悉的證明。
