第二天,我仍然在醫院留醫。這次的感冒菌比我想像中強。 雖然我十萬個不情願見到他,但王匡今天又來了病房找我。 「我發覺你真係好得閒!」 我冷淡地說。「乜你唔知有錢人除咗錢多,時間都好多?」 他自豪地說。 我反了反白眼。 「哈哈哈… 你啲表情好搞笑! 你真係好有娛樂性! 哈哈哈…」 王匡續道。 我完全不想理會他,於是乎我用被子遮掩著我的臉。 王匡見狀,便試圖掀開我的被子。 「喂! 你做咩呀?」 丘令風大聲喝住王匡。 原來丘令風今天也要來看他的病人。 「又係你呢個態度惡劣到極~點嘅醫生呀?」 王匡輕佻地說。 「先生,呢度所有病人都因為你嘅噪音而休息唔到。」 丘令風義正詞嚴地說。 「哦… 丘令風醫生! 你知唔知我係邊個?」 王匡問。 「你係邊個都好,總之你喺度阻住病人休息我就有權叫停你,甚至趕你出去!」 丘令風說。 「丘醫生,凡事留一線。你唔駛趕我走,我自己走! 不過,喺臨走之前...」 王匡忽然行到我身邊,輕吻了我的手背一下。 「唔駛驚訝,外國禮儀, goodbye kiss!」 王匡狀甚風騷。 我慌忙地用被子抹乾淨我的手背,並露出扭曲的表情。王匡見狀,哈哈大笑了起來。 「姚楚行,你真係好有趣! 下次丘醫生唔喺度時再同你玩耐啲!」 王匡說道。 見到王匡步出病房,我不禁舒了一口氣。 此時,丘令風仍然站在我的床邊,直瞪著正在離開病房的王匡。 「Liam,唔該你!」 我鼓起勇氣對丘令風說。 他輕輕地「嗯」了一聲,就頭也不回地返回他病人的床位。 見到冷淡的丘令風,我不禁幽幽嘆氣。 為甚麼曾經相愛的我們,會落至如此境地? *** 黃昏的探病時段,王匡又來了病房找我。 「又係你? 你想點呀王先生?」 我無奈地說。 「想見你囉!」 王匡在我床位的桌子上用雙手托著腮,天真地看著我。 「其實你太悶唔駛嚟搵我㗎... 你返去打機啦!」 我苦勸他離開。 「你都未得閒陪我打機,等埋你先打!」 他輕浮地說。 「我唔會陪你癲! 」 我大聲說。 「咁你可以陪我做乜?」 他淘氣地說。 「王先生,你返病房休息啦! 我求求你!」 我哀求他說道。 「好呀! 我一陣返。」 他若無其事地說。 「姚楚行,你有無男朋友?」 王匡忽然問道。 「無,但我有未婚夫。」 我答。 「咁即係未結婚啦! Yeah!」 他手舞足蹈地說。 「王先生,你可能因為喺醫院無嘢做先咁多幻想。我係一定一定會同我未婚夫結婚! 」 我激動地說。 其實暗地裡,我也不太肯定能否與Caine成婚... Caine完全忘記了想跟我求婚的事... 「唔好咁肯定。大家聽住!!! 啪! 啪! 啪! 啪! 啪!」 王匡突然用力拍手去吸引病房內所有人的注意。 「我叫王匡,大家幫我做個見證。我由今日開始就要將呢邊呢位姚楚行小姐追到手!」 王匡指著我說。 病房內的人即時議論紛紛。 「開party呀? 俾隻酒杯你敲好唔好?」 丘令風又與王匡同在病房出現。 丘令風滿臉通紅,非常生氣。 「丘醫生,你下次可唔可以再遲啲先出現呀?」 王匡掃興地說。 「人哋已經訂咗婚,你唔好搞人哋!」 丘令風正色地對王匡說。 「個病人訂唔訂婚,拍唔拍拖都關你事呀,大醫生?」 王匡問。 受到病房內所有病人和家屬的注目禮,我已經夠尷尬; 現在還要把丘令風牽扯進來... 「呀醫生,你次次都要干涉我同姚楚行嘅對話... 你同姚楚行識㗎?」 王匡問。 我和丘令風都沈默不語。 王匡轉了轉眼珠,一臉恍然大悟的模樣說: 「你唔係就係嗰個未婚夫呀?」 王匡表現得難以置信。 我現在已不敢正視丘令風... Caine是我和丘令風心中的刺。 「我唔係佢未婚夫。」 丘令風字字鏗鏘。 「咁你無權干涉我追唔追姚楚行啦!」 王匡理直氣壯地說。 「隨便你,我只係唔想你騷擾到任何一個病人。」 丘令風說。 見到丘令風斬釘截鐵地否認是我的未婚夫,心臟又收緊了一下。 我暗地裡多麼希望丘令風會認作是我的未婚夫; 即使只是扮作我的未婚夫,替我解圍也好。 而且,他真的不在乎我的感情生活了嗎? 我跟誰在一起,他都完全不在乎了嗎? 他真的把我當成陌路人了嗎? 王匡被我打發走後,我到了一趟洗手間。途中,我在走廊碰到了丘令風。 我舉起手想跟他打招呼,但他完全地無視我,在我身邊走過。 我的雙眼突然模糊了... 他真的只把我當作一個普通病人。 *** 留院兩天後,我又回到我的工作崗位。 李爾婷見到我,一手把我拉到她的辦公室房間內... 「Kayla,你好番嗱? 唔休息多幾日?」 我很不習慣李爾婷這麼體貼。 「多謝關心,我好番好多。」 我一臉狐疑地望著李爾婷。 「你肯定? 我可以俾你休息多兩日㗎!」 她的好意令我毛骨悚然。 「真係唔駛啦! 多謝!」 我語窒地說。 「咁我有無嘢可以喺工作上幫輕你?」 我望著李爾婷,真想問問她: 「小姐,你邊位呀?」 不過,我真的對李爾婷有一事相求。 「Brianna,我想問... 我可唔可以唔做王匡個case?」 「點解? 好煩㗎佢?」 她問。 接著我便把王匡的身份和他對我做的事情告訴李爾婷。 她聽罷,想了一陣子,對我說: 「OK呀! 咁我接呢個case啦!」 她爽快地說。 嘩! 李爾婷迴光返照嗎? 幹嘛這麼隨和? 或者是因為王匡身份的關係吧! 李爾婷最喜歡跟權貴拉關係。 「唔該晒,Brianna! 咁我出返去做嘢先啦...」 「唔駛客氣! 你出去做嘢啦!」 她說。 李爾婷是否在這兩天接受了腦移植手術? 她當好人的模樣太恐怖了! 隔了一會,我準備找李爾婷商量另一位病患的案子。豈料我在她的房門外聽到她激動地說: 「我知我當初明知佢病都要佢接case係好harsh... 但反正病咗都係食藥,醫院咁多藥!」 「同埋我宜家咪話俾多兩日病假佢囉! 我已經事後補救番! 佢自己唔放咋嘛!」 她續道。 「點解你咁執著個問題係我當初有無叫佢返工? 佢都病好啦! 」 李爾婷愈說愈激動。 我從她的房門隙偷看她跟誰在說話... 原來她在聊電話。 我大概猜到她在電話中談論的是我,但她會和誰這麼激動地談到我? 聽到她沒有再說話,應該掛線了吧! 我敲了敲她房門並進入了她的房間。「唔好意思Brianna,我想問...」 「又係你累我俾Liam鬧! 點解一講到你,我就一定會變衰人?」 李爾婷臉紅耳赤地說。 我心想,原來丘令風仍然留意著我的一舉一動。 我的心又泛起漣漪。