我有bb同埋結婚,Auntie Sandra就最開心。 唔單止因為自己細佬終於有人要,仲要親家係自己好朋友。 當然,個bb係最大嘅意外驚喜。 我哋嘅婚禮非常簡單,只係簽咗紙同食咗餐飯就搞掂。家人,尤其係彭湃,唔想我同bb咁粗勞。 況且,彭湃好怕做show俾人睇,所以唔大搞婚禮佢舉腳贊成。 如是者,宣咗誓,交換咗戒指,我成為咗彭太。 *** 懷孕初期,我一直祈求我哋個bb係女仔,因為女仔無咁多病痛,亦無咁大可能係資優或者special。 由於當時我唔係點爆瘡,個肚又圓碌碌,我好有信心係女。 「恭喜彭生彭太,係仔嚟㗎!」 喺我陀住bb嘅第四個月,我個婦科醫生由衷地祝福我哋。 但我開始擔憂... 我開始擔心如果個仔真係資優,會唔會好似爸爸咁小學俾人排擠? 我會唔會唔識教? 香港有無足夠嘅教育配套俾呢啲小朋友? 佢宜家仲喺我個肚度我已經咁擔心,我幾時先擔心到我死嗰日? 原來做媽媽,就係呢種感覺。 好彩嘅係,我有一個責任心好強嘅老公。 喺成個懷孕期間佢無論喺生活上定係飲食上都照顧得我好好。我食乜嘢之前佢都會做我同個仔嘅銀針,試過晒無問題先俾我哋食。 佢仲買咗架車,儘可能管照管送。 結婚前我都估唔到佢可以咁好。 *** 4個幾月後,我有一日如常企喺學校門口等佢嚟接我放工。點知喺佢未嚟嘅時候,我俾一個中學生撞倒我。 我頓時跌坐喺馬路邊,剛剛到學校嘅老公見狀即時落車過嚟扶起我。 我因為太驚,即時喊咗出嚟。我好擔心,好擔心會整親個仔。 老公車咗我去醫院。醫生睇咗我情況後,話我要即時催生。催生嗰時嘅陣痛真係痛到我好想爆粗鬧彭湃做乜搞大我個肚。 後來當我痛到我都唔知自己仲係咪生存緊嘅時候,醫生話開夠度數,可以入產房。 陪咗我入產房嘅彭湃,未見到個仔出嚟已經俾啲血腥場面嚇到迷迷糊糊。我好肯定下一胎我寧願叫我媽咪陪我都唔會俾佢陪產。 最後,我都唔知吸氣呼氣幾多次之後,我哋個仔出咗世。 我第一眼見到個bb, 我即刻睇吓佢睜開眼後似邊個。 YES! 好彩有彭湃嘅濃睫毛同埋我嘅雙眼皮! 如果係「純潔的單眼皮」就無咁靚仔。 我大嗌彭湃個名叫佢睇吓個仔,點知,佢原來已經出咗去出面,驚魂未定。 但醫生一俾個仔佢睇,佢就即刻醒晒,仲係咁喊住多謝醫生護士。 我哋個仔叫做「彭凡」。我哋都想佢「平凡」一點。做人,平平凡凡可能先係最開心。 我唔知彭凡第日會變成「彭非凡」定係「彭平凡」,呢個亦都唔係我最在意嘅事。 我只求佢可以活到一場佢認為開心,值得嘅人生,就可以了。 宜家嘅我,好攰,好肚餓,仲開始覺得傷口有啲痛。我只希望我嚟緊呢6個鐘頭內可以落床痾到生bb後嘅第一篤尿,同埋可以把握時間瞓多啲。 可以為自己愛嘅人去生一個我哋都愛嘅人,原來真係好滿足。