自從朗豪坊嗰晚,我同彭湃正式拍拖。 我事後問過佢同佢個文青friend,即係Chantel嘅關係,佢坦白同我講Chantel曾經為過佢自殺,但宜家佢哋只係朋友。 其實彭湃真係覺得Chantel只當佢係朋友?我唔敢肯定囉... 我亦都同彭湃講Quinn向我表白嘅事,佢面色一沈,話好想打獲佢。 知佢呷醋,我好開心。 我哋拍拖嘅生活好sweet, 始終大家都第一次拍拖,所以好投入。不過拍咗拖之後先發現,原來自己好蠢。 我讀書叻,但缺乏生活常識。彭湃讀書叻,但生活常識都好豐富。 佢會教我點打掃先方便得嚟又乾淨啲,又會教我點樣計數快啲。佢仲會幫我和家人整電腦,換燈膽,做家務... 雖然佢對住我家人唔多嘢講,但我家人都好信賴佢。 *** 五年過去,我都無再喺cafe度做。我搵到一份我鍾意嘅工作: 教書。自從照顧過津津,我發現我好鍾意小朋友。 彭湃仍然係一個編劇。自從兩年前佢寫嘅一部電影好賣座,佢變得開始忙碌。佢寫嘅劇本被評為精闢獨到,一語中的。大概係同佢資優人嗰啲"think out of the box"有關。 彭湃唔係一個好識俾驚喜我嘅人。佢比較踏實,而且唔識守秘密。 就好似今日,係我哋拍拖5週年紀念日。佢想同我求婚,我一早就知。 佢3個月前試圖偷過我隻戒指,但俾我發現咗,當場被捕。 上星期佢開始日日提我今日唔好OT, 因為要慶祝anniversary。 其實我都有個驚喜俾佢。 去到餐廳,一見到嗰啲波波,banner咁,都完全明白係咩事。 彭湃見到我,就俾咗個戒指盒我,對我說... 「你快啲同我求婚。」 我對眼roll到去後腦,搞乜呀彭生? 「紀少言,快啲啦!」 彭湃好心急。 「乜唔係應該係你向我求婚?」 「鬼叫我唔知你戒指size...咁我咪買我size嘅戒指,要你向我求婚。」 佢覺得自己好有道理。 呢個時候,我真係忍唔住,爆佢seed。 「彭生,喺求婚之前,我有嘢同你講。」 我好認真。 「你唔係唔求婚呀? 你講過好多次要嫁俾我。」 佢胸有成竹地說。 「我... 將會升職。」 「咁好? 都話一早應該升你!」 「但我要先去英國進修一年先俾我升...」 我認真地說。 佢呆咗... 因為自從拍咗拖之後,我哋差唔多日日都形影不離,互相依賴。要分隔兩地,佢個反應話我知,佢handle唔到。 我慢慢把戒指遞俾佢,對佢講... 「所以... 結婚都係遲啲先。」 佢攞番隻戒指,別過臉,一臉落寞。 我哋嘅5週年紀念,就喺一大堆奢華佈置入面,沈默咁過完。 *** 由於就快升職,我嘅工作愈來愈忙。彭湃嘅工作都好忙。以前我哋幾忙都一定會見,但週年紀念嗰晚之後,我哋有3日無見。 開始教書後,我發現我個人好易精神緊張。胃痛係家常便飯,腸胃差到無人有。 一個星期後,我有日喺學校胃氣脹得好犀利。加上我呢幾日都有啲傷風,我俾同事送咗去醫院。 同事通知咗我父母,佢哋立刻嚟到睇吓我乜嘢事。 彭湃隨後都趕咗嚟醫院。 佢一嚟到,佢即刻叫我唔好咁操勞。升唔升職好閒,升唔到就佢養我。 「我宜家都打算唔去英國,因為去唔到。」 「你有重病呀...」 彭湃緊張哋問。 我搖搖頭,然後對佢講... 「冷靜啲,我有咗。」 「有咗b...b?」 「係,佢宜家喺呢度。」 我指一指我下腹,示意有個小生命喺入面游緊水。 彭湃一臉錯愕,但見佢兩行眼淚不受控咁流咗落嚟。 「咁即係你唔洗走之餘,宜家仲多個人陪我哋?」我熱淚盈眶地點點頭。 之後,我哋相擁而哭咗好耐。