其實頭先一聽到Auntie Sandra話彭湃鍾意我,我個心一直都跳到好似心臟病發咁。 我今日唔想返屋企食飯,唔想有人打擾。我想一個人不受滋擾地周圍行吓,沈澱一下紊亂嘅思緒。 於是,我熄咗電話,我一個人搭巴士去咗尖沙咀海傍。 我開始漫無目的咁行... 好多人同我擦身而過。 唔知呢度有幾多人同彭湃一樣都係資優嘅呢? 沿途見到一啲高我一個頭嘅男仔,我會不期然咁望一望,睇吓會唔會有可能係彭湃... 見到啲戴住耳筒喺海傍賣唱嘅歌手,我都會望多兩眼,睇吓彭湃會唔會突然間走咗去賣唱。 我覺得自己好低能。 其實今日下午俾Quinn攬住嘅時候,我覺得有啲唔自在。我嗰時有啲想掙脫佢,但津津喺度,我唔想嚇親佢。 相反,上次喺病房出面俾彭湃攬住,我心跳得好快。我想繼續俾佢抱住,我唔想離開佢太遠。 我承認,我鍾意咗彭湃。 但係,我以後應該用點樣嘅態度同埋心情面對佢呢? 仲有,彭湃鍾意我其實只係Auntie Sandra嘅片面之詞... 我應唔應該相信彭湃同我嘅想法一樣? 如果表錯情真係會好。 我繼續行吓行吓,不知不覺由碼頭行到去旺角。當我發現自己行咗咁遠,已經係夜晚十一點半。 我猛然醒起自己唔記得打電話俾媽咪通知佢我唔返屋企食飯。我立刻攞部電話出嚟... 弊! 我唔記得自己熄咗機。 我一開番電話見到好多個電話留言同埋message。今次死喇! 我媽咪爹地一定好擔心... 我即刻打電話俾媽咪... 「媽咪, 對唔住呀,頭先電話無電... 不過我約咗mui姐,佢借咗尿袋俾我差電。宜家打到俾你啦!」 「你講大話! 你喺香港識嘅人我都打晒俾佢哋,無一個話見過你! 你宜家喺邊? 快啲返嚟屋企,你返嚟我再同你講!」媽咪把聲好嬲。 等等... 如果媽咪打晒俾所有我識嘅人,咁Auntie Sandra都應該收到電話... 即係話彭湃都可能會知道我失咗蹤幾個鐘。 呢個時候,我電話響起。 係彭湃打嚟。 今次係佢第一次打電話俾我... 我好緊張咁接電話。 「喂...」我戰戰兢兢地說。 「你喺邊呀?」彭湃把聲,好勞氣。 「我宜家喺朗豪坊,準備搭車返屋企。」我回答佢嘅聲線就好似一個做錯嘢嘅小朋友咁。 「你喺朗豪坊正門等我10分鐘,唔好行開,我送你返屋企。」 彭湃以命令嘅口脗對我說。 於是,我喺朗豪坊等咗整整10分鐘之後, 終於準時見到嗰個我宜家最掛住嘅人嚟到。 彭湃一路大步行過嚟,一面抖大氣。佢應該係跑過嚟搵我嘅。 「你頭先去咗邊呀?」 彭湃嚴厲地問我。 知道咗自己心意之後,我唔敢直視佢。所以我周圍望,扮諗緊我去咗邊度。 「我頭先放工之後搭巴士去咗尖沙咀海傍,跟住行咗去文化中心... 再過隧道去咗Sogo嗰邊,之後沿住彌敦道行... 入咗美麗華行咗一陣,再行去佐敦嗰邊, 跟住...」 當我向彭湃娓娓道來我去過邊度嘅時候,彭湃突然細細聲咁講咗句... 「你真係太多嘢講喇!」 跟住佢好快咁用雙手捧住我塊面遞去佢嘅方向,再用力將佢嘅咀唇印喺我咀唇上。 佢錫咗我個咀一啖。 今次唔再係意外錫到,係佢主動錫我㗎... 「你真係好嘈! 我唔封住你個口唔得!」彭湃帶點霸氣地說。 我對眼仍然係瞪到好大... 我好似唔識眨眼咁。 跟住彭湃緊緊地攬住我, 溫柔地說道... 「不過你無事真係太好啦! 嚇死我!」 哈呢路亞! 我係咪發緊夢呀? 如是者,彭湃攬住我幾分鐘。佢完全無鬆開手嘅意慾,而我都無掙脫佢嘅意慾。 喺佢懷抱入面,我先知乜嘢係真正嘅安全感。 突然間,我醒起我唔可以再俾佢咁攬落去。於是我推開彭湃,同佢講... 「唔得啦! 我要返屋企啦!」我焦急地對他說。 彭湃對我溫柔咁笑咗一笑,就拖住我隻手一齊去搭巴士。 佢嗰個笑容,比佢對住津津個笑容,溫柔多一百倍。