彭湃走咗之後,直到收舖都無返過cafe。 正當我準備換衫放工時,Auntie Sandra同我講... 「紀少言,傾兩句吖!」 「好呀! 」 跟住我哋就坐低咗喺彭湃成日坐嗰張枱度。 「津津和謙謙呢?」我問。 「今日星期五,佢哋去爸爸度過夜。」 Auntie Sandra答道。 突然Auntie Sandra表情變得嚴肅起來,接著說... 「紀少言,彭湃鍾意你。」 「哈哈哈…無可能!」 我嘗試以笑聲否認。 「個衰仔真係鍾意咗你。」Auntie Sandra認真地說。 「但佢好多時見到我都嬲爆爆,點會鍾意我呀?」 我都好認真地說。 「佢嬲爆爆係為咗掩飾對你嘅心意啫。或者你唔知,彭湃係一個資優人士。佢雖然好叻,但資優人士嘅情感管理比較差... 」 「乜資優唔係好事嚟咩? 資優嘅英文係gifted, 係一個禮物...」我好疑惑。 「其實資優未必係好事。資優人士好多時都會俾一樣叫做Over Excitabilities (OE)嘅嘢折磨,即係佢哋對外界嘅訊息會有比正常人更深嘅感受。正面訊息當然無問題,但接收負面訊息對於佢嚟講可能會崩潰。」 Auntie Sandra繼續講... 「彭湃由細到大都好孤僻,因為佢自七歲被確定係資優兒童時,長輩俾咗好多期望佢, 但同輩就排擠佢... 到咗我28歲,即係彭湃18歲嗰年,我哋父母因為車禍過咗身。自此之後,彭湃就成日戴住個headphone, 想逃避一啲唔好嘅訊息。所以個耳筒對佢嚟講,係一個避風塘。佢雖然性格比較孤僻,但佢好錫我同埋兩個姨甥。」 Auntie Sandra續道... 「自從佢遇到你之後,我見住佢對你有幾在意... 尤其當你同呀Quinn一齊嘅時候,佢就會變得好嬲。呢個係因為OE令佢放大咗自己嘅憤怒同埋妒忌, 但佢其實唔係想對你發脾氣㗎。」 「原來係咁...」我啲眼淚開始喺眼框入面湧吓湧吓。 「紀少言,其實我好鍾意你嘅開朗性格。我覺得你會幫到彭湃,令佢更放開自己,做一個開心嘅人。不過,我都知你有其他條件好好嘅追求者。我唔係逼你揀彭湃... 我只係希望話你知,其實我細佬唔係一個衰人,而佢真係好在乎你。以上次你患流感為例,佢喺醫院度過夜,就證明你對佢嚟講真係好重要。」 「原來,你知道佢嚟咗過夜...」我對Auntie Sandra說。 「點會唔知呀? 我同佢一齊住,當然知佢有無返屋企啦! 而我知佢去咗你度,係因為你媽咪話我知嘅。你媽咪有一日朝早7點就見到彭湃喺你房門口瞓著咗。」 「原來你哋都知道晒...」 我驚訝地說。 「夜啦,你媽咪等緊你開飯! 快啲返屋企啦!"」 跟住Auntie Sandra就趕我返屋企。 如果Auntie Sandra唔講,我都唔知原來我唔係單戀緊。