聽到彭湃嗰個咁悔氣嘅答覆，我肯定今日喺醫院見到嗰個背影，一定係佢。 點解佢當時唔行過嚟陪津津? 佢明明係津津舅父，比我同Quinn更有資格陪津津睇醫生... 點解... 「因為佢鍾意你囉，懵炳! 佢妒忌你又同呀Quinn一齊呀!」 電話傳來mui姐八婆般嘅聲音。 我因為呢啲迷思，打咗俾我最信賴嘅mui姐。 我講晒呢排撞番呀Quinn，同埋和彭湃發生嘅所有事俾佢知。 聽到mui姐話彭湃鍾意我，我個心...好似收緊咗一下。 「無可能... 佢有個好親密嘅女仔朋友。我問過佢係咪暗戀個女仔，佢無答我。仲有，個女仔又高又靚，最重要係，彭湃同佢傾偈嗰時笑得好開心... 相反，佢同我一齊多數時間都係黑面嘅。」 我要話俾mui姐知，彭湃無可能鍾意我。 「聽完你咁講，似係你鍾意彭湃多啲喎。」Mui姐又用嗰種世事都被佢看透嘅tone嚟同我講。 「癡線! 更加無可能! 我覺得你話我鍾意呀Quinn仲有可能!」 「但你同Quinn嘅經歷... 好似...點講呢... 好似好唔真實咁。」 Mui姐續道... 「你哋重遇之後，Quinn係不斷幫你。佢表現得好完美，完全唔會有脾氣。又或者咁講，有時佢幫你，到底係真心，定係想搏你好感? 我睇唔透。」 我即時反駁mui姐... 「咁係人都想有個無脾氣嘅完美男朋友啦! 呀Quinn做好人有乜問題?」 「問題就係佢太好人。如果你搵個機械人做男朋友，佢都可以好完美。但拍拖就係要搵一個可以喺佢面前做真正自己嘅人。你問吓自己，你寧願揀一個可以包容你發脾氣嘅男朋友，定係你永遠要做到完美佢先開心嘅男朋友?」 我同mui姐收線之後，我思考咗佢講嘅說話。 我發現Quinn都係一個正常人，無可能無脾氣。只不過我哋重遇之後只係見過大家幾次，可能Quinn仲未有機會表露多啲情緒俾我睇啫! 更何況，每次喺我最需要人幫嘅時候，Quinn都會出現喺我面前幫我。佢有權選擇唔幫我，但佢無咁做。 同Quinn一齊我真係覺得好有安全感。咁我對Quinn有好感，有乜問題? 相反，除咗同彭湃唔小心錫咗一啖，以及佢上次喺水吧拉住我之外，其他時候佢對我都係嬲爆爆... 有無人會經常對住自己鍾意嘅人黑面? 我係一個愛恨分明嘅人; 我就一定唔會囉。
