呢一刻，全車嘅乘客都變得鴉雀無聲。 我同彭湃都仲未識反應過來， 所以我哋嘅咀唇仍然係叠住咗。 突然，一位師奶乘客刺耳嘅聲線劃破沈默，大聲高呼咗一句: 「哦! 原來佢兩個耍花槍呀!! 嘻嘻嘻！」 跟住成車人即時起哄。 「醒啦! 紀少言! 醒吓啦! 」我心入面激烈地提醒自己。 我下意識即是大力咁推開咗彭湃，佢亦因此而坐番去佢本來個座位度。 呢個時候，我剛巧見到有乘客落車，隨即扔下彭湃個大耳牛，跟住佢哋一齊衝咗落車... 「落錯車 如離開了幸福的高速路 誰又保證我明天將更好」 我唔係唱緊歌; 我係落錯車，仲要我又係喺九龍塘鐵路站度落錯車。 到底頭先發生咗咩事呀? 我今日又點去津津學校呀? 點解會咁㗎? 媽呀! 我好亂呀!!! 對唔住呀媽咪，我做咗一樣咁羞恥嘅事... 爹哋，對唔住呀! 我俾你以外嘅男人用佢嘅咀唇掂到我! 細佬....對乜嘢唔住呢? 唉呀! 唔知呀! 到底發生咗咩事呀!?!?!?!?!? 為咗整理咁紊亂嘅思緒，我個人喺不知不覺之間竟然踎咗喺度。突然，我聽到遠處傳來一把久違了但熟悉嘅男人聲... 「小姐，你無事嘛?"」 我抬頭一望，我真係有啲不能相信自己對眼... 「Mr. Quinn?」 我問。 「Errr...Phyllis? 原來係你呀! 」 無錯，Phyllis係我英文名。而Mr. Quinn係我喺澳洲讀大學時認識嘅一個香港人助教。估唔到喺香港都撞得番。 「Mr. Quinn 你點解返咗嚟香港嘅? 你無喺uni教嗱?」 我好奇地問。 「不如等我關心你先啦! 你仲踎咗喺條街度呀小姐! 哈哈～」 「仲有，你都畢咗業啦，叫我做Quinn得啦!」 Quinn就係一個咁nice，咁體貼，同埋咁細心嘅人。Final year嗰年，因為我 Marketing Data Analysis考試炒咗要補考, 都係靠佢幫我惡補我先可以準時畢業。 而且我成日覺得佢好似日本嗰個小栗旬... 外型上絕對係我杯茶! Quinn慢慢伸手扶起我。跟住同我講... 「我俾BU請咗我做講師，所以今日嚟campus傾埋啲合約細節。如無意外，下星期正式返工。」 「太好啦! 我以後都會經常嚟開呢一邊! 可能我哋會再有機會撞到!」 跟住我就將我宜家喺Morning Glory返工，以及我被Auntie Sandra拜託我去接津津嘅事話咗俾Quinn聽。 「希望我哋第日可以碰到面啦! 唔，我都係要去BU啦，不如我俾我電話你，大家WhatsApp保持聯絡。」 如是者，我同Quinn交換咗電話之後，佢就向BU方向行走咗。 不過，原來我頭先同Quinn嘅對話，彭湃全部都看在眼裡。 「花癡，你捨得接放學未呀?」 彭湃用黑過玄壇嘅咀臉嚟問我。 「呀! 係喎! Sorry, 完全唔記得咗!」 我咀角含春地答道。 「你呢個花癡，五分鐘前錫完一個男人，轉頭又可以對另一個男人心花怒放。」 我感覺到，彭湃仲嬲過頭先。 跟住我同彭湃就開始行去津津學校。原來學校就係喺九龍塘鐵路站嘅下一個巴士站附近。 但沿途我哋一句說話都無講過。 *** 「舅父仔! 哈哈哈哈哈～」 到咗學校門口之後，有個眼大大，紥孖辮嘅小妹妹跑去彭湃嘅方向。 「津津今日乖唔乖?」彭湃用我從未見過嘅笑容同埋溫柔聲線同津津講嘢。 「津津好乖!咁舅父仔今日乖唔乖?」 津津捉住彭湃衫袖，天真地問。 「津津咁乖，舅父仔梗係都好乖!」 彭湃對住津津嗰個笑意盈盈嘅表情，唔知點解我覺得毛管戙... 「咦，舅父仔，呢個呀嬋係邊個嚟㗎?」 我唔想承認，但津津隻手指一路指住我，一路叫我呀嬋... 「Hello津津! 我叫做紀少言，你可以叫我Phyllis姐姐，但我唔係呀嬋! 我由聽日開始會嚟接你放學。"」我嘗試抑壓住我嘅不悅，擠出微笑同津津打招呼。 「哦! Hello，呀嬋!」 津津好堅持叫我呀嬋。 彭湃同津津呢兩甥舅，都係令人扯火嘅存在。
