菜蜜妹妹不知不覺都16個月大啦，但係佢嘅濕疹都仲係好反覆，加上對蛋敏感，所以可憐地好多美食都唔試得，但係佢又非常為食，最近我要出動殺手鐧嚟氹佢，就係大人小朋友都喜歡嘅雞翼～以下呢個雞翼味道好濃厚，妹妹當然唔係食呢款味啦，不過實在係好美味又易煮，一定要喺度分享下。 照燒檸檬雞翼 食譜材料：雞翼12隻、檸檬3片(切塊去核)、蜜糖2.5湯匙醃料：生抽1湯匙、鹽1茶匙、米酒1湯匙、糖1茶匙、胡椒粉適量、生粉1茶匙醬汁：生抽2湯匙、味醂1湯匙、糖2茶匙、水半碗1. 雞翼洗淨後抹乾，以醃料醃2小時備用。2. 燒熱油，中火煎雞翼至兩面金黃。3. 倒入醬汁小火加蓋炆煮10分鐘，再加入檸檬片及蜜糖，轉中火煮至汁料變濃即可。=== === === === === === === === ===歡迎訂閱及讚好 芙芙little kitchen：Facebook: www.facebook.com/fulittlekitchenIG: www.instagram.com/fufu_littlekitchen=== === === === === === === === === 原本係煮汁前落檸檬，但煮太耐檸檬會出苦味，所以食譜就調整咗，喺收汁時先落檸檬。 煮汁時要邊攪拌，以免黏底。 汁料酸酸甜甜，加上雞翼啖啖肉，真係好惹味呀。
