上星期開始回復公司返工,突然身邊有咁多家人以外嘅人,同事又個個開籠雀咁(當然包括我),剎那間唔係太習慣咁多人與聲,由開頭唔習慣Home office,到而家好想日日喺屋企對住兩個女,真係要啲時間再適應下公司返工先得。近來天氣炎熱,有時工作到個人都燥燥哋,一於煲返碗糖水雪凍飲下,慰勞下自己先。 紅棗雪耳燉桃膠 食譜材料:桃膠1抓 約少半碗)、雪耳1件、紅棗10粒、冰糖適量、水2L1. 桃膠用水浸過夜,將雜質去除,再用水清洗備用。2. 雪耳浸軟後洗淨撕成小塊,紅棗剪半去核備用。3. 水滾後,將桃膠、雪耳放入以大火煲滾,轉小火煲40分鐘。4. 將紅棗及冰糖倒入,煲15分鐘即可。------------------------------------------------------**更多簡易食譜、小菜苗與菜蜜妹妹生活日誌**↓歡迎 Follow and like ↓Facebook:芙芙little kitchenIG: fufu_littlekitchen------------------------------------------------------ 乾桃膠份量少少已經可以發到好多,今次冇磅到實際重量,大約係1手抓落去嘅份量,記得要俾多啲水去浸。 喜歡膠啲可以用大雪耳,喜歡稀啲用一小朵雪耳就夠。 反正都係煲,梗係要煲啲養顏又滋潤嘅糖水啦。 雪凍後會變杰身啲,我就好喜歡呢種少少杰又清甜嘅口感,飲完成個人透心涼呀。