無論你申請嘅係working holiday 定移民，假如你想去加拿大生活一段日子好多時候移民局都會要求你申請無犯罪紀錄證明書（Police Certificate，簡稱良民證）。最近我幫親人申請香港嘅良民證，雖然申請手續簡單，但當中都有好多細節要留意，所以想同大家分享。 1. 申請良民證當你收到加拿大移民局要求你申請良民證嘅信件果陣，你就可以去香港灣仔警察總部申請良民證。只要你喺網上印好所有表格同填妥，預約咗時間，你就可以去無犯罪紀錄證明書辦事處辦理申請手續、打手指模同俾錢。完成所有手續之後，職員會問你良民證要寄去邊個地址。以往嘅做法就係寄去移民局信件列出嚟嘅地址（通常喺信件底部，係加拿大辦事處地址）。但喺最近嘅申請，職員話所有申請俾加拿大移民局嘅良民證都會統一寄去位於鰂魚涌華蘭路嘅香港加拿大領事館。所以，你辦好手續之後，只要拎返張收據就完成咗申請程序。2. 向加拿大移民局確認你已申請良民證當你申請完之後，唔好以為你就完成任務。由於你唔知道究竟加拿大政府幾時先會收列張良民證。所以，你暫時唯一可以做嘅就係寫封解釋信，附上你嘅申請收據回覆加拿大移民局你已經向香港警方申請良民證。3. 查詢良民證嘅申請進度根據警方網上資料，良民證會喺申請後四星期內將「無犯罪紀錄證明書」以掛號函件直接寄給有關領事館／移民局／政府部門。但如果你喺四星期後仍然未收到加拿大政府確認收到你嘅良民證。你可以發電郵去eo-cncc-ib@police.gov.hk查詢申請進度。 查詢申請狀況時，要提供以下資料: 1) 英文全名 (姓, 名) 2) 香港身份証號碼 (如適用) 3) 護照號碼 4) 申請日期 / 寄出文件日期 / 收據上的申請編號 (CNCC號碼)。你亦可以要求職員提供郵寄追蹤編號，確保你嘅良民證已經寄送到目的地。4. 聯繫香港加拿大領事館做完以上嘅步驟，唔講唔知原來仲有一樣嘢要做！一直我都以為香港加拿大領事館收到良民證之後會自動交返俾加拿大果邊處理，原來實情並唔係咁。加拿大移民局喺我哋申請咗良民證兩個月後再通知仲未收到香港嘅良民證，所以唯有要打去香港加拿大領事館果邊查詢一下，職員話原來申請人需要發電郵（英文/法文）去hkongimmigration@international.gc.ca 去要求將你嘅良民證發返去加拿大移民局。如果無做呢一個步驟，你嘅良民證只會坐喺個領事館果度等。發電郵果陣記得提供有關資料，包括你良民證申請資料、你申請嘅program (Immigration, sponsorship, working holiday)、UCI編號等等。當我哋發咗電郵之後，大概10日後就收到加拿大移民局確認收妥香港良民證嘅信啦！要留意嘅係有關嘅申請程序隨時都會改，一切都要以局方資料為準，大家當參考一下啦，祝大家申請順利！額外資料：· 良民證申請程序：https://www.police.gov.hk/ppp_tc/11_useful_info/cert_no_crime_local.html· 良民證申請常見問題 (FAQ)：https://www.police.gov.hk/ppp_tc/11_useful_info/cert_no_crime_faq.html· 香港加拿大領事館 (Consulate General of Canada in Hong Kong - Consular, Immigration, CBSA)電話 +852 3719 4700想繼續接收加拿大多倫多實用生活資訊就要繼續follow【90後加拿大移民記】🚩Instagram/Facebook: fromhkgtoyyz要了解更多我生活嘅大小事，就follow【29+1媽媽】啦～🚩Instagram/Facebook: 29plus1mamaImage Credit:rawpixel.com@freepik.com
