有好多網友都問我究竟當時點搵到工。2016年我去多倫多working holiday，拎住個一年嘅open work permit，當時我都係度諗有咩工可以做、可以試、可以揀。以下係我嘅經驗分享，希望俾到準備移民或剛剛到埗嘅你有少少頭緒。 1. 搵合符你工作經驗同技能嘅工作可以喺新地方做得返老本行就最好不過啦，搵工如果有相關嘅工作經驗，日後工作都容易適應啲。雖然係咁，加拿大好多僱主都會想搵有加拿大工作經驗嘅人，如果係咁嘅情況，見工嘅時候就要把握機會表現到你喺香港嘅工作經驗會點幫到你勝任呢份工作，貢獻到公司。例如你嘅語文能力（兩文三語）、刻苦耐勞嘅精神。2. 搵最能夠展現你長處嘅工作如果你本身嘅工作喺加拿大搵唔到相關嘅行業/工作，建議你可以諗諗一啲工作崗位係最能夠展現你嘅優點。假設你嘅語文能力好好，講到流利廣東話、英文、普通話，服務性行業絕對係你嘅好選擇，例如航空公司地勤人員/空中服務員、餐廳服務員、銀行或電話公司顧客服務代表等等。3. 研究一下有咩大型企業請人如果你純粹想搵一份穩定嘅工作，咁你就要留意一下有咩大公司請人，例如政府、銀行、電訊公司、Google、Amazon、百貨公司、超市、各大時裝品牌。通常佢地招聘都會刊登喺公司網頁，同埋LinkedIn專頁。大公司勝在夠穩定，而且福利唔錯，仲有好嘅在職培訓同內部晉升機會嫁。搵政府工睇呢度：https://emploisfp-psjobs.cfp-psc.gc.ca/psrs-srfp/applicant/page2440?fromMenu=true&toggleLanguage=en4. 研究有咩工搵到錢假如你純粹諗住向錢嘅方向諗，又唔介意由頭起步。好多工作都好有「錢」途。例如保險/地產經紀、汽車銷售員佢地都係專業人士，入行要考牌。佢地除咗賺取低薪，仲可以賺佣金。如果自問對銷售無興趣，都有好多技術性工作可以搵到錢。例如巴士/地鐵/貨櫃車司機、警察、裝修工人、農夫。5. 兼職、合約、臨時工都OK當時我拎住一年open work permit，第一份嘅加拿大工作就係一份contract based嘅工作。合約為期十個月，任務係要接替一個放產假嘅同事 ，喺Marketing公司做Coordinator。雖然合約只得十個月，但憑住我120分嘅工作表現，老闆最後喺產假同事回巢後另外再安排一個新工作崗位俾我，做佢地嘅全職員工。所以，無論你嘅加拿大工作經驗係短又好長又好，有咗第一個本地工作經驗之後嘅路就好行好多嫁啦！想繼續接收加拿大多倫多實用生活資訊就要繼續follow【90後加拿大移民記】Instagram/Facebook: fromhkgtoyyz要了解更多我生活嘅大小事，就follow【29+1媽媽】啦～Instagram/Facebook: 29plus1mama#加拿大搵工 #工作假期 #打工度假 #加拿大 #多倫多 #工作 #移民 #港人移民 #移民後生活 #加拿大工作 #canada #toronto #IEC #workingholiday #canadapr #workincanada #workingholidayhk #immigration #torontoblogger #hkcouple #fromhkgtoyyz圖片來源：Unsplash
