BIGBANG係韓國就黎開SHOW，話說上次 MADE FINAL in Seoul 我都有去，而且非常深刻！！ 事源我同朋友係IG買飛，以往既經驗都無問題成功交收，諗住今次都無死，開開心心買機票BOOK酒店。 點知到出發前一星期，賣家話係香港交收唔到，要韓國交收，呢個情況姐我睇日本場都試過，仲寄到去酒店，所以我仲未為意；呢位賣家仲同你約時間地點交收，當時我諗應該仲OK既… 因為返工原因我朋友比我早出發，而我就係下午出發，我朋友去到已經不停whatsapp賣家都無回應，而我係香港亦不停打電話俾賣家，之後我上返IG搵返買家個名，點知變左第二個人，仲要係俾佢呃左既人開返相同既名話呢個人呃人，入面一大班苦主救助，個一刻個心空左，好唔開心，問自己點算，都到左機場，無理由唔去架；同時，一班苦主開左個whatsapp group，當時係問有咩方法買飛，韓國一年可以去幾次，去韓國睇BIGBANG演唱會未必次次都去。 Btw, 去到韓國我心情仍然好輕鬆，若然係香港應該發左癲，我同朋友都抱住睇到就睇既心態，亦密切留意個group用咩方法買飛，過程好辛苦，有的人深宵排隊，有的人等第一班地鐵9衝排隊，有的人買場外黃牛，最糟糕的是連場外黃牛都是假票，我記得個晚落大雨好凍，苦主們不停更新佢地現場消息，又俾保安趕又變落湯雞咁，到最後我同朋友都決定第二朝食完早餐先去。 我記得去到會場藍天白雲天氣非常好，但 點 解 我 地 會 比 人 呃 ！ 我記得我地由11點幾排到5點幾左右！期間，好好地坐係地下會無啦啦叫人起身，好似準備做啲野咁，然後！突然！全部人向前衝，而我朋友仲著緊對鞋，我亦唔理咁多衝左先算，我好相信我朋友會搵到我，無錯10幾秒到，佢搵到我，從此之後我地十指緊扣，永不分離咁款俾人迫俾推向前，好辛苦，嘩！過左三個月仍然瀝瀝在目。去到5點幾左右，天呀！我地終於買到飛！！！但離開場得返10分鐘，好多poster都未影！！！唯有把握時間，拿拿淋快快脆咁影。 係，最後我地成功睇到演唱會。媽呀！諗起都辛苦！ 黎緊8月佢地係韓國又開十週年演唱會，今次唔去啦，唔係因為吸取上次經驗驚左，而係留返d假去生日旅行；可能有的人睇左會覺得我地好蠢，好無知，但去睇海外演唱會唔係本地人又買唔到飛既時候，你就要靠代購，好多時都係靠信字，就等如你上網買野一樣，你唔知會唔會寄失左，寄少樣野俾你，真心呢d都係個人誠信，今次就當買左個教訓，而且我地一大班苦主都報左警，之後既野都等警方處理。 只可以同大家講搵一個信譽良好既良心賣家好緊要，更加希望唔好再有人出黎呃錢，成功呃錢得一時既快樂，案底會跟你一世。 To all BIGBANG fans共勉之，買佢地飛真係好困難。
