位於充滿藝術感嘅K11 Musea，入面嘅輕食店嘅裝潢同食品都特別有心機。今次一嚟到呢間主打素食輕食同素雪糕店DAMA，有好精緻嘅店面、好有藝術感嘅店內設計同擺設，雖然位置唔多，得3張 4人枱同4-5個單人座，但靚靚嘅pattern令每個角落都變成打卡位﹗點擊圖片放大 首先就講吓呢度最多人食嘅 Vegan 軟雪糕啦﹗ 紅火龍果 ＋ 燕麥奶 軟雪糕今日有兩款味，我自己平時都飲咗Oat Milk幾年，今次有得試Oat milk認真要試試，除咗好香燕麥味，仲keep到奶滑嘅口感，而紅火龍果相對比較接近雪芭嘅軟雪糕，果味嘅清甜點綴咗燕麥奶嘅味道，第一次試呢種配搭，估唔到又幾夾﹗ 日式麻醬烤豆腐卷 餡料除咗有牛油果、仲有鹽烤百頁豆腐，由豆漿製成再經氣炸鍋炮製，相對少油啲，配埋其他超新鮮又多水份嘅配菜，咬落層次好豐富，味道又好清新﹗ 清熱除濕湯 ［蓮藕、粉葛、赤小豆、腰果、扁豆 ]作為一個夜瞓小編，平時真係好需要湯水嘅滋潤，今次養生啲揀咗中湯，值得一讚係呢度雖然主打雪糕，但煲出嚟嘅中湯都好有水準，調味啱啱好之餘仲畀足湯料，食完個雪糕飲返杯個胃即刻暖晒﹗
