在香港，有質素嘅韓燒韓國菜真係買少見少， 試過尖沙咀韓國街好多韓國餐廳， 但係就冇一間真係特別好食特別值得推薦， 竟然係茫茫人海中比我遇上你「韓珍」～ 「好時辰先找到你，天公對待我真好 」 係機緣巧合之下， 在openrice見到網上訂座有折扣優惠， 單點餐牌8折， 睇相又好似幾好喎， 所以就諗住試下～ 嘩，餐廳都幾full！ 疫情未減下，都可以咁full， 可想而知餐廳口碑都幾好！ 建議去之前預早book定位先～ 餐廳由韓國人主理， 唔怪得裏面有咁多韓國人、日本人幫襯， 黎回憶下家鄉嘅味道～ 曾經八色五花肉在韓國好出名， 估唔到在香港都有得食！ 而且仲有好多其他套餐優惠～ 套餐好切合港人口味， 除咗五花肉之外， 仲有海鮮、牛肉、豬肉等， 五花八門嘅配搭， 梗有一款啱你！ 點擊圖片放大 +4 呢到仲有醬油蟹食，唔洗去韓國都食到啦！ 「韓珍」嘅肉夠新鮮， 所以唔洗加任何調味料， 本身已經肉香十足， 蘸上麵豉醬、黃豆粉、麻油海鹽， 用生菜夾起來一齊食，更別有一番風味！ 我地倆口子揀左一個有豬肉和牛肉嘅二人套餐，成個套餐$580， 有齊沙律、主食和甜品， 仲有集五花肉、豬肩肉、調味特級牛肋骨於一身嘅拼盤， 大大份，好抵食！ 點完餐之後， 店家就如傳統嘅韓國餐廳一樣， 送上免費前菜六小碟， 泡菜味道好傳統，鹹辣剛好！ 沙律可以從甜南瓜沙律和牛油果生果沙律二揀一， 鐘意食南瓜嘅foodie一定唔可以錯過甜南瓜沙律！ 足足有五個雪糕球咁大嘅南瓜蓉，香甜味美！ 沙律菜仲加左柚子醋，味道酸酸甜甜，夠晒醒胃！ 好多女士一聽到五花肉可能就會怕怕，怕肥！ 不過韓國嘅五花肉總係令小編可以跳出個comfort zone， 紅白相間嘅五花肉， 食落唔會好肥膩，反而肉汁豐腴，值得一試！ 豬肩肉相對地比較瘦， 油脂分布均勻，有筋有肉，而且肉香十足！ 調味特級牛肋骨超大塊， 用自家製嘅醬汁醃製， 味道鹹香，鬆化入味～ 最後仲可以要返個泡菜豬肉湯， 泡菜超多，微辣惹味，送飯一流！ 隨餐附送蛋薄餅， 第一次食韓式蛋餅， 裏面有啲洋蔥、三色椒，味道都幾特別～ 隨餐附送柚子茶或雪糕。 地址： 韓珍 (尖沙咀) 尖沙咀麼地道68號帝國中心地下高層UG43號舖 營業時間： 星期一至日：12:00-15:30，17:30-23:00
