自從「打邊爐家族」之後， 少左好多人去打邊爐， 但其實只要做好個人衛生，就唔會有問題架啦！希望快啲抗炎成功啦！ 我同小妹今次去左旺角「火鍋撚」打邊爐， 餐廳都嚴陣以待， 食客全部都一律要探熱同用酒精搓手液消毒雙手方可入座， 「火鍋撚」所有餐具都係即棄， 仲推出左一人一鍋， 咁就可以打邊爐食得放心啦！ 見到佢推出左新湯底，係沙嗲溝麻辣湯底， 啱晒重口味又嗜辣嘅我哋！ 台式古早沙嗲麻辣鍋（$129） 以十多種藥材熬製而成，好香濃， 辣勁比一般沙嗲湯底強， 帶沙嗲和沙茶香氣， 仲有配料蜂巢豆腐和鴨血， 吸盡湯底嘅精華，正！ 小妹係食肉獸， 所以打邊爐一定要有肥牛， 極品安格斯肥牛（$229） 肥牛有小和大兩個size， 我地order左大， 不過份量比我想像中少， 颜色唔係好鮮艷， 不過勝在肉香有嚼勁！ 火鍋撚香滷拼盤（$119） 1次過可以食晒所有滷水：蜂巢牛肚、香滷大腸頭和香滷牛筋， 滷水味幾入味， 腸頭厚肉有口感，牛筋嫰滑，值得一試！ 上次試左黑松露墨魚滑和瑤柱干貝滑， 兩款都好正！ 今次就試下第二種口味啦！ 鴛鴦滑滑拼盤（$98） 黑松露墨魚滑好香嘅松露味， 仲有粒粒墨魚肉係裏面，食落爽彈有嚼勁！ 香菇貝鮑鮮滑材料豐富，口感十足，好味道！ 紅薯寬粉（$40） 扁長條狀嘅寬粉條夠煮不爛， Q彈煙韌， 有咁正嘅湯底，一定要有吸湯嘅配料！ 最後， 每枱食客都會贈送腐竹糖水沙冰乙杯， 腐竹味真係好突出， 夠晒清涼解渴！ 點擊圖片放大 +11 地址： 火鍋撚 (旺角) 旺角染布房街6號1樓 營業時間： 星期一至日：17:30-03:00
