同小妹係銅鑼灣剪完頭髮,就去附近搵食, 小妹話想食好食嘅心太軟, 小編第一時間諗起「HeSheEat」啦~ 食心太軟,「HeSheEat」真係不二之選! 哦,原來轉左新menu, 有好多新菜式, 仲有Dinner Combo, 不過今次嘅set dinner唔係好吸引, 所以我地就散叫,食返「HeSheEat」嘅皇牌~ 點擊圖片放大 +5 小編每次必點: 蕃茄蟹肉牛油果莎莎配墨西哥脆片 ($85), 沙律嘅味道一如既往嘅美味, 最底層係軟滑嘅牛油果醬, 第二層係拆左骨啖啖肉、鮮甜味美嘅蟹肉, 最頂層係酸甜清新嘅蕃茄粒莎莎和矜貴嘅黑魚子, 淨食得, 將莎莎塗上脆片上一齊食都得, 味道和口感都好有層次! 值得一讚嘅係伴碟採用墨西哥脆片, 感覺無咁飽濟,好似食nachos咁,正! #牛油果控不可錯過嘅蕃茄蟹肉牛油果沙律 單骨蜜糖芥末雞翼($55) 單骨雞翼方便食用, 熱辣辣炸起,炸皮夠薄,香脆可口, 肉質鮮嫩多汁,加上惹味嘅蜜糖芥末醬,正! 係「HeSheEat」,龍蝦仔黑魚子牛角包就食得多,不過而家出左新口味! 又係牛油果控嘅口福啦! 牛油果蛋沙律煙三文魚牛角包配田園沙律($74) 好足料呀! 原個香軟嘅牛油果, 加上海量嘅蛋沙律, 仲有魚油脂香嘅煙三文魚, 牛角包雖然唔係好夠熱,但勝在香脆, 整體來說,好正呀! 牛油香草燒春雞配日式薯仔沙律($118) 呢道係新菜式,最鐘意食雞嘅我地梗係唔可以錯過啦! 原隻春雞好大隻,仲要即叫即燒! 雞髀肉嫩滑多汁, 雞胸肉厚肉,肉香十足, 原隻燒春雞價錢咁平,真係好抵食,必試! 綠茶心太軟配豆腐雪糕($62) 每次切開心太軟都覺得好治癒~ 綠茶軟心緩緩流出來,味道香濃回甘, 加上清新嘅豆腐雪糕, 可以中和一下心太軟嘅膩感, 旁邊仲有煙韌嘅白玉和綠茶蕨餅,正! #超濃郁抹茶流心心太軟 沖繩黑糖菠蘿沙冰($38) 菠蘿沙冰香甜,灑上沖繩黑糖作點綴,不錯嘅配搭, 不過略嫌有d冰粒未打碎晒。 地址: HeSheEat (銅鑼灣) 銅鑼灣記利佐治街2-10號銅鑼灣地帶2樓201號舖 營業時間: 星期一至日:12:30-23:30