「忠記咖啡屋‧私房菜」，下稱為「忠記」， 是小編係銅鑼灣返工嘅飯堂， 因為佢嘅午餐、下午茶份量夠晒大份， 食物質素又相當有水準， 由於餐廳每日供應不同是日午餐， 又有恆常嘅茶餐、三餸飯/麵等， 所以我試過一星期5日都食佢， 食極都唔會厭！ 唔講唔知， 原來「忠記」有成五十年嘅歷史， 裝潢如普通茶記格局， 但晚市就賣小菜和私房菜， 咁岩同班同事可以準時收工， 就約埋一齊食私房菜啦！ 我地點左個四人餐（$688） 點擊圖片放大 +4 先上私房靚湯， 是日為金錢草雞骨草煲排骨， 果然係老火湯，味道甘香，又解暑氣， 岩晒平時捱夜又無住家飯嘅打工仔飲啦！ 稻庭烏冬北海道帶子 嘩！無諗過中菜館竟然有一道咁日式嘅菜式～ 2L size 嘅北海道帶子輕輕煎香， 裏面保留着半生熟的肉質，鮮味彈牙！ 稻庭烏冬煙韌有彈性， 澆上自家製嘅日式芝麻和風醬，夠哂滋味！ 招牌海南雞半隻 雞件厚肉嫩滑，雞皮爽口而不膩， 再蘸上旁邊的醬汁：辣醬、甜豉油和薑蓉一起吃，更添惹味！ 酥炸美國桶蠔（一桶） 一份有8隻「巨型」桶蠔， 每隻都半個拳頭咁大，好抵食呀！ 桶蠔入口沒有多餘的腥味或酸味， 肉質鮮甜肥美， 最重要係炸粉薄身，炸得香脆可口！好好食呀！ 茄汁爆原隻大虎蝦（四隻） 虎蝦蝦肉肉質結實，爽口彈牙， 配上香甜茄汁更添滋味！ 家鄉私房椰菜炒肉碎 雖然其貌不揚， 但卻相當有內涵， 椰菜爽脆，肉碎微辣惹味， 送飯就最岩啦！ 生炒臘味糯米飯 用砵仔上嘅糯米飯，好古色古香， 糯米飯炒得煙韌入味， 加上鹹香嘅臘腸、臘肉、蝦米、冬菇等， 面頭再加埋雞蛋， 足料得黎，口感又多層次， 冬天凍冰冰最適合食糯米飯暖身架啦！ 回味鮮菠蘿咕嚕肉（$72） 小編最愛食咕嚕肉，所以便單點了一客～ 每件豬肉都好大件，而且炸脆得很， 粉漿一點也不厚，肉又夠厚， 醬汁包着每塊肉片，酸酸甜甜，好滋味！ 是日糖水為薑湯芝麻湯圓， 薑湯夠晒辣， 芝麻湯圓用上寧波湯圓， 糯米皮煙韌，芝麻餡流心。 食左咁多道小菜， 樣樣都無得彈， 埋單每人都唔洗$200， 真係好抵食呀！ 下次一定要再返尋味！ 地址： 忠記咖啡屋‧私房菜 (銅鑼灣) 銅鑼灣渣甸街50號渣甸中心1樓
