見「烏龍燒」門面不錯， 又想吃串燒，便試試看～ 點知竟然中伏！ 入座時見每個爐都有獨立抽風系統，覺得不錯， 但入座後才見到點餐紙上的價格不便宜， 我們三人行便就住個荷包，叫左少量食物。 小編就最愛吃玉子燒， 所以便點了窩蛋菜甫玉子燒（$33） 原塊鐵板上枱，上面放着8塊玉子， 而菜甫和生雞蛋分開擺放。 由於上枱時，店員沒有詳細為我們介紹如何製作， 只叫我們先把玉子燒好，然後便可加上其他配料。 福佬便以為先把玉子分開放上燒爐， 並不知道原來是原塊鐵板放上去。 後來直至有一女店員悪言相向「邊個教你地咁樣燒？我地無理由無同你講點樣燒！」， （如果你地有講解清楚，我地都唔會咁樣燒啦） 然後我地逐問女店員「正確燒法係點？咁而家點算？」 佢還嘲笑我們「唔緊要啦，反正都係食晒落肚啫。」，「不過而家做唔到窩蛋效果」， 而從來無打算幫我們或換過，令我們十分不爽！大家都食到成肚氣！ 純粹就整道菜來說， 其實只是普通的蛋煎玉子燒加菜甫， 菜甫味道是幾惹味，但整體味道很普通！ 皇牌燒牛舌（$35） 其實一開始便覺得這道菜很貴， 三塊牛舌竟索價$35， 但由於在場有個愛吃牛舌的朋友， 所以便忍着荷包的肉赤。 雖然牛舌係厚切，口感也不錯， 但份量只有三小塊，價錢始終覺得太貴，不值！ 烤雞腎串（$24） 我們見雞腎串$24有兩串，相比起牛舌都算抵食！ 雞腎清洗得幾乾淨，燒熟左幾爽口！值得一試！ 燒三味雞翼（$29） 雖一開始餐紙上已標明三味雞翼為蒜蓉味、黑椒味、蜜汁， 但實際上自己食左咩味真係完全感受唔到， 只能說調味顔色是夠， 但味道卻是完全不成比例。 不過好在我們把雞翼燒得軟嫩多汁～ 惹味黑松露墨魚滑（$48） 連燒雞翼都有鐵板提供， 軟趴趴的墨魚滑為什麼沒有呢？好費解！ 所以我們依照紙上的介紹小心翼翼地把墨魚滑原塊放上燒烤爐燒， 反轉面燒也要特別小心，要不然就會散開晒。 燒熟後的墨魚滑都算彈牙， 黑松露味幾突出，只係有d腥！ 不過福佬就覺得黑松露味有點怪。 原隻新鮮魷魚（$39） 原隻魷魚size比我們想像中細， 本來無任何調味，所以可用店家提供的醬油自行調味， 但整體覺得不太抵食。 煲仔牛肩胛肉稻庭烏冬（$58） 有三塊牛肩胛肉，件件夠厚，脂肪又平均，未食已經覺得正！ 唯不知名的白色湯底（牛乳？），食完只食到鹹味。 烏冬沾上牛肉的血色， 煮完部份變左啡色， 而且我們待湯底滾起等太耐，烏冬可能煮得太熟，口感太腍！ 燒韮菜（$19） 韮菜新鮮粗又長，燒完食落幾爽脆，可以一試！ 蒜蓉牛油焗什菌（$33） 整餐最抵食的應該是這道菜， 什菌款式多，份量合理，蒜蓉牛油味又足！ 店內有多款手工啤酒可選擇，$38一支價格都算合理。 我們分別點了Monteith's Summer Ale和Monteith's Radler Bier， 但兩支啤酒都感覺酒味太淡， 感覺像喝水一樣。 還有一點令我們充滿疑問就是點菜紙雖標明每兩位可免費揀一款廚師特調Funny灑灑粉， 我們三位在點菜紙選了惹味香菇粉，卻從來沒有上過枱， 只有一開始放下的鹽、醬油、蜜糖、芥茉、孜然粉、七味粉等， 不過見店員態度不友善，我們便沒有額外再追問。 本來今餐係打算請福佬食餐好來慶祝生日， 但食完之後覺得今餐晚飯不論食物、服務都太～差， 福佬仲要因為店員服務太差而有相當不愉快的體驗， 唉，絕對唔會再黎，仲要叫d朋友唔好幫襯！ 地址： 烏龍燒 (旺角) 旺角白布街24號藝興大廈地下14號舖 營業時間： 星期一至四、日：18:00-03:00 星期五、六：18:00-04:00
