士多啤梨控注意！！！ 12月至4月係士多啤梨當做既季節。相信好多人都係日本或者韓國摘過士多啤梨，因為佢地出產既士多啤梨又香又甜。其實想摘下士多啤梨都唔洗去到咁遠既，皆因香港都有個好值得去既士多啤梨園，岩晒d士多啤梨控！小編雪雪講緊既就係元朗大棠士多啤梨園啦！！！就算對士多啤梨冇太大興趣既朋友都不妨可以黎影下相，呃下like！！！ 小編當天既戰績！！！粒粒都又大又紅！！！ 搭西鐵係朗屏站落車之後，係B2出口出，再轉乘K66號巴士，係大棠迴旋處站落車。（由於K66係港鐵巴士黎，所以搭港鐵或者輕鐵既乘客係朗屏出閘後60分鐘內，可享有免費轉乘優惠喔！） 係大棠迴旋處站落車之後，會見到呢幅banner，跟住佢指個方向直行就岩架啦！ 行前少少之後可以靠右繼續直行，向前望會見到有個牌坊。 穿過大棠村門口，會見到右邊有個球場，之後繼續向前行。 去到呢個位就可以跟住指示右轉。 行上少少斜坡就到架啦！！！ 入到黎之後，負責人會比個籃同把交剪你方便收集士多啤梨。由於佢係免費入場，所以係走既時候先需要比錢。 呢度有幾幅士多啤梨田，而全部士多啤梨都係日本種，總共有5個品種比你慢慢揀。其中包括： 日本靜岡縣-章姬， 日本佐賀-清香， 日本熊本縣-紅臉頰， 日本奈良懸-紅寶石， 日本福岡縣-博多甘王。 日本既士多啤梨種類繁多，黎自唔同縣既品種雖然有唔同，但行外人要分辨其實一d都唔容易。小編我一於唔理咁多，見到又大又紅粒既就摘左先，哈哈哈！！！ 無意中被小編發現呢粒生到好似UFO咁既士多啤梨！>_< 摘到咁上下，就可以拎住個籃去番入口。負責人幫你鎊完之後，會用個膠盒幫你裝住。上圖小編摘左$70。 急不及待想食兩粒士多啤梨過下口癮既你，可以係度洗埋食埋先走喔！ 小編差d唔記得講，去士多啤梨園當日既天氣唔錯，唔會太曬而且係閒日，所以可以欣賞到呢片清幽既環境，影相影到日落都冇人理，哈哈！！！ 小編建議當日摘既士多啤梨要即日食，咁先品嘗到佢最新鮮既味道喔！！！ 入開黎元朗又唔嫌遠既朋友又或者係大棠睇完紅葉既你記住黎感受一下摘士多啤梨既樂趣啦！！！ 特派港女: 雪雪 更多元朗美食: https://foodiesatyuenlong.wordpress.com/ 朗屏士多啤梨園 地址: 青山公路元朗段117號D [googlemaps https://www.google.com/maps/embed?pb=!1m18!1m12!1m3!1d3688.2861117781626!2d114.02132161453302!3d22.418254585262385!2m3!1f0!2f0!3f0!3m2!1i1024!2i768!4f13.1!3m3!1m2!1s0x3403fa40617c7f31%3A0xebf784a2bd44dbba!2z5pyX5bGP5aOr5aSa5ZWk5qKo5ZyS!5e0!3m2!1szh-TW!2shk!4v1487660649036&amp;w=600&amp;h=450]
