全港最好食雞煲—元朗醉好熊仔檸樂檸七 高質海鮮配料 去開Yoho附近,其實都經過呢間醉好火鍋好多次,今日終於入去試吓,門口有個好得意嘅裝飾,有煙不斷冒煙,忍唔住影咗啲相先入去。呢間火鍋店係由正宗四川人主理,坐低就叫咗招牌熊仔檸樂,同一杯熊仔檸七。 熊仔檸樂 熊仔檸七 $38真係超得意呀,好似一隻熊仔沖緊涼咁,打卡一流!打邊爐梗係要配汽水,爽落特別爽呀。 香茜雞煲 $168 半隻雞煲叫咗唔辣,因為病完好返無耐,原來以為可能會無咁好食,但結果真係超~級~驚~喜!好好食呀,芫茜爆多,一上枱香氣滿分,一打開個蓋就流口水,店員喺隔離烹調,仲會提你幾時食得,服務超好!雞煲醬料食得出食配咗好多香料製作而成,每件雞肉切得大細適中,放入口岩岩好,而且醬料味道濃郁得嚟好掛汁,但竟然唔會太咸,食得出個廚師好比心機整,無論係件雞嘅熟度同味道,都恰到好處!比起我之前食過N間雞煲,呢間真係全港世一!真心! 潮州牛丸配貢丸 $68另外點咗潮州牛丸配貢丸,佢地來貨係用貴價靚料,一食落就知,絕對唔係便宜貨,潮州牛丸出名好食,食到口咬到一絲絲牛肉質感,真係好少可喺火鍋店食到正宗潮州牛丸,而且貢丸亦係豬肉比例甚高,絕對唔係溝滿麵粉之作,兩重丸都值得嗌,高質又好味。 響鈴 $68打邊爐無響鈴係無靈魂,所以一定要嗌,醉好嘅響鈴係即叫即製,一夾起就Feel到好脆身,放落湯浸3秒就食得,雞煲醬汁配上響鈴脆,真係勁勁勁好味呀!忍唔住清晒成盤,都唔記得咗卡路里係咩事,忍唔到口呀。 頂級安格斯牛脊 $188厚身靚牛,肉質食落就知係貴價野,食落有濃郁牛味,牛脂香氣濃,食得好滿足。 蟶子(時價)今日叫$48蚊,一上枱見到有驚喜,係蟶子皇嚟,仲要即劏超級新鮮,放落湯浸熟佢,拎返上嚟仲要完全無縮水,證明係真心新鮮。 整體嚟講,係一間好用心經營嘅店舖,每位店員都好友善,會好關心你用餐感受,老闆笑容滿面,令人感覺好舒服,係一間待客之道好好嘅餐廳,呢個價錢嚟講係好值,又唔貴,我同老公食完都大讚,一定會再返嚟食多次呀!!