平日下午茶都要等位😅去新城市廣場行街食嘢,兜咗成圈係呢間最多人,見下午茶有飯有定食仲有甜品,都幾吸引,於是乎我哋又去㩒張飛仔,點知唔洗等好耐就有得入去食😍下午茶餐比午市套餐平少少,但係問咗職員,啲飯份量係會細少少,而且冇沙律,大胃王都係揀咗午市套餐🤣之後加下午茶甜品餐😍炙燒豚肉丼,$78朋友要咗豚肉餐,我見好吸引,所以夾咗兩塊豚肉嚟食,真係好好味呀,燒得好香,佢上面有少少Wasabi,撈埋係飯度食勁好味,豚肉上面仲有一層紫菜碎,一大塊肉包住一大啖飯好過癮。 雞肉碎炸茄子丼,$78佢嘅雞肉係雞肉碎,份量勁足,啲飯多到我要分一啲俾朋友食,上面有一層蓮藕做配菜,好好味,茄子我就覺得淡咗啲,不過加埋啲雞肉同飯,就啱啱好,好鍾意呢兩款丼。 長崎蛋糕法式多士, $58呢個多士勁好味,脆脆地甜甜地,好香牛油味,可惜細塊咗少少,兩個人分有啲唔夠喉,朋友都話好好味,上面係雲呢拿雪糕,好正。 甜紅薯泥丸子冰淇淋, $58呢款上面有雲呢拿雪糕,中間夾住好甜嘅番薯,下邊係八粒小丸子,小丸子加埋番薯一齊食就啱啱好,因為番薯真係好甜,雪糕筒上面嗰款雪糕係一樣味嘅,我自己就鍾意法式多士多啲,不過呢款都好味嘅。 全部餐都有配嘢飲嘅,咖啡係自己加奶同埋糖,自己控制甜度。朋友話下次都要再嚟喎,大家都食得好滿意。