唔知大家興唔興端午節要做節架呢？ 不過其實都係美其名做節，實情就係搵個藉口同親戚朋友聚下架啫。 我地就梗係唔會放過任何一個機會去搵好野食啦！ 今次我地就去咗沙田石門嘅某間酒家 (其實之前都好鍾意去尼度，但後來發現出品每況越下，所以好耐都無黎過lu......)。 嗱，但係經過今晚尼餐之後，又對佢有返小小信心喇喎，哈哈~~~ 當晚到達酒家時，人都未坐低個侍應就問：今晚燒鵝得返2隻，洗唔洗幫你留起半隻？ 嘩！聽到佢咁講梗係即刻答：好吖！(雖然個心係度諗，真定假呀？！咁好賣？！) 人到齊有傾有講之際，開始聞到一陣香味，果種香味係會令人口水量突然大增嘅香味。 一抬起頭想周圍望嘅時候，已經見到靚姐手上捧住燒鵝行緊埋黎 (其實都重有成7-8個身位先到我地張枱)。 當燒鵝放低喺我地面前時梗係即刻食咗先講啦！嗯~~~真係超級邪惡，味香、皮脆、皮同肉之間果層油入口即溶、d肉好嫩滑唔會"梅"。好耐都無食過咁正嘅燒鵝，心諗師傅功架好得，更加打從心底有dd歉意頭先懷疑個侍應，哈哈哈哈~~~~。 當晚加拿大龍蝦做緊優惠$88/斤，無錯！係$88/斤！唔叫都真係對自己唔住。加多小小錢要埋麵底，咁就大人細路都有得食。 龍蝦肉好彈好實，味都好鮮甜，證明真係新鮮生猛龍蝦，個醬汁味道啱啱好，唔太淡又唔太咸，唔會好水又唔會好"傑"，撈落d麵度好好食。 無菜又點得呢？羅漢齋係我至愛之一，食材新鮮、芡汁適中，唔可以唔提個豆腐，豆腐超滑，滑到可以輕輕力吸入咀嘅山水豆腐！ 啫啫雞煲，雞肉滑。但比一般酒家嘅啫啫雞煲淡，如果鍾意濃味嘅朋友仔可以覺得唔夠喉。 哈哈~~~驟眼睇係咪以為果d係芽菜呢？ 其實係"花生苗"黎架，我都係第一次食 (因為唔係度度有)，好得意，個頭食落好重花生味，而條莖就好爽脆，一試我就愛上。 後來原本想加個片皮鴨，但已經賣哂......咁就叫半邊乳豬咬下啦！ 乳豬皮真係燒得好鬆好脆，入面d肉又一d都唔咸，重要係滑嘅， 真係要再一次讚下尼度d燒味師傅！ 人齊、氣氛好都要加埋美食先可以叫"歡聚歡聚"吖嘛，你話係咪？！ @沙田石門 foodcorpshk格言： 唔怕周圍食，只係怕你唔好食，哈哈~~~~ #foodcorpshk為食兵團 #飲食blogger #講飲講食 #美味中菜 #真心讚嘅燒味師傅
