[攝自London St. James Park] 好似未試過同大家分享一d飛行的故事 今次就同大家分享一下啦～（笑） 見到平時好多同行都會講：「空姐空少絕對唔係得派餐！」 每次見到呢d post都會拍爛手掌 因為我地肩負既責任的確比派餐更大 每當inflight有任何突發事情發生， 我地都要隨時變身做消防員，急救員，甚至係反恐警察（唔係講笑架） 但有時我地都會有多另一個身份－社工。 係一次飛去倫敦的航班 由於已經做完2個餐飲服務 已經攰到就散 我同另一位同事A 同埋阿姐(機艙事務長）一齊坐係galley休息下 正當我地傾計傾到興起之時 突然廁所傳黎：「Bomb！Bomb」既聲 我地立即停低手頭上做緊既野 去廁所出面敲門問下入面發生咩事 問左幾聲 無人應 我地就企係門口等個乘客出黎 同事A：「死啦，佢會唔會係裡面暈左架？！」 我個心即刻離一離 諗緊如果真係有人暈左應該點做（驚） 等左一陣 終於打開門啦 等待我既唔係恐佈分子 亦都唔係病到就暈既乘客 而係一個大喊緊既細路仔。 我地問佢：「發生咩事呀？做咩喊呀？係咪邊度整親呀？」 佢帶住哭腔話：「我好掛住屋企人呀！！」 然後崩潰大喊。 我地幾個即刻叫佢入galley坐低傾下計 問下佢咩事順便安慰佢 細問之下，原來呢個12歲既細路仔岩岩過左英國讀書大概半年 係寄宿學校無咩朋友 屋企人係佢去左英國之後搬左新屋 但係又無留間房俾佢 返到屋企只能夠同daddy mammy訓 兩個哥哥年紀相差好遠 完全玩唔埋 去到英國又無親朋戚友係個邊 只有學校司機黎接佢 總而言之 佢係英國可以話係好孤獨 無daddy mammy錫 但係呢個小朋友好有理想 好清楚自己將來既路 我地就不斷安慰佢： 「唔緊要啦！暑假好快又可以返去！」 「你就當而家係實現理想囉！唔係個個都有機會出國讀書架～」 「試下寫信寄返去俾daddy mammy～呢個會成為你將來好寶貴既回憶！」 得知佢又要自己一個過custom 拎行李一腳踢 我地就幫佢contact ground staff 帶埋佢出閘 雖然呢件事好微不足道 但係我地係佢最需要人支持同開解既時間幫到佢 有個傾訴對象 個人無咁負面 都係一件好事 佢將來未必會記得我地 但係起碼我地俾左正能量佢 令佢覺得有人關心佢 已經好難得 畢竟我地呢個社會正能量太少了:( 每個乘客係每班機上 都有佢既故事 有人係為左重逢 亦都有人係分離 我地能夠做既 係除左確保佢地能安全順利抵達目的地 就係令佢地開開心心咁落機 將所有唔開心既野都放低係架機度 重新出發 呢個亦都係我keep住熱誠繼續做落去既原因：） 今次可能會有d長 希望下次同大家分享更多有趣既故事！ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ 歡迎邀稿，試用及合作 Email: flying.trapeze28@gmail.com theztyle: http://flyingtrapeze.theztyle.com beauty exchange: http://www.beautyexchange.com.hk/blog/%E7%A9%BA%E4%B8%AD%E9%9D%9E%E4%BA%BA UBlog: https://blog.ulifestyle.com.hk/blogger/flyingtrapeze/ BeautyExp: http://www.beautyexp.com/articles/author/flying-trapeze28gmail-com/
