隔左幾日終於出到第二篇台北遊記！ 今次係介紹瞞著爹～ 瞞著爹係台北總共有四間分店 一店係食握壽司 而二店就係食爐端燒 而我今次就係食位於忠孝復興既二店 話時話點解瞞著爹叫瞞著爹呢？ 就係話說當時老闆係瞞住自己爸爸係台北開呢間鋪 所以就叫做「瞞著爹」啦～(笑） 佢地既晚市係5點半開始 建議大家去之前一定要book左位先 因為佢地幾乎晚晚都爆而且坐位唔多 如果唔想去到先知無得食就要book定位先啦～ 點餐可以單點或者每人點一set套餐 套餐有3款價錢:TWD1500,2000同埋3000 而套餐係無餐牌既 因為佢地每日都有唔同既新鮮漁貨同食材 基本上係師傅煮咩你食咩（唔使擔心，上餐前會問你有咩唔食） 我地今次揀左TWD1500 既套餐(因為最後一晚食盤川有限lol) 同埋提提大家 呢度係無得碌卡 所以要帶夠銀彈呀XD 呢個就係我地當日既套餐啦～ 有齊哂刺身壽司海鮮同牛排 非常豐富！ 以下係我特別挑選出黎介紹出黎俾大家既菜色～ 呢款帶子係師傅炙燒過既 中間夾住飯粒 而且帶子半生熟 個口感好有趣！XD 而呢個牛小排亦都係燒得岩岩好 外脆內軟 同埋佢既sauce有少少似薑蔥既味道 配埋牛肉食真係好match! 呢個係大根配魚既小煮 瞞著爹都大根既處理同烹調都好講究 呢度既大根用燜既方法黎煮 非常入味 而醃製既酸大根既味道都控制得非常好 除左醋酸味之外仲有少少似柚子既甜味滲出黎 酸甜度平衡得好好 好開胃！^^ 講起大根 師傅會成日表演刀功俾我地睇XD 你睇下 大根俾佢片到好似紙咁薄！！O.O 爐端燒好著重廚師同食客既交流 除左講解食材既來源同煮法之外 師傅都好關心我地食得開唔開心 d野食岩唔岩食 臨到最尾佢仲會問你食飽未 因為佢唔想你覺得貴夾唔飽！（笑） 我地今次三個人total 連埋服務費總共食左TWD4950 但係由於我地係第一次幫襯 店家特登打左個九折俾我地 最後埋單TWD4500 大概係港紙1000啦～一人都係大約消費300幾蚊港紙 其實都算係好抵 用咁價錢食佢既食物質素 環境 同埋師傅係你面前表埋演 呢個價錢基本上無得挑剔（笑） 簡直滿足哂你既眼耳口鼻XD 唯一要挑剔就係同好多高級餐廳一樣 裡面係黑媽媽既 滿足唔到相機食先既願望XD 食一餐爐端燒大概需時2小時 所以可以揀一個行程無咁緊密既夜晚去食～ 呢次既台灣之旅真係滿足哂我咁多個願望^^ 用比香港平1/3 甚至一半既價錢 去享受同香港同樣質素既料理 我諗好多吃貨去旅行個時都係咁樣既心態（笑） 以前仲係讀書年代去台灣 為左慳旅費兼所謂體驗台灣飲食文化XD 幾乎晚晚都plan去夜市 其實每個夜市都差唔多食個d野lol 而家其實台灣都開左好多物有所值既料理餐廳 價錢唔貴之餘仲可以食到好野 大家下次去台灣不妨發掘下～發掘到順便話我知哈哈＾＾ ♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥ 歡迎邀稿，試用及合作 Email: flying.trapeze28@gmail.com theztyle: http://flyingtrapeze.theztyle.com beauty exchange: http://www.beautyexchange.com.hk/blog/%E7%A9%BA%E4%B8%AD%E9%9D%9E%E4%BA%BA UBlog: https://blog.ulifestyle.com.hk/blogger/flyingtrapeze/ BeautyExp: http://www.beautyexp.com/articles/author/flying-trapeze28gmail-com/
