2013年4月25日,正當台灣確診第一宗H7N9時,我卻選擇左一個人去上海!冇錯!係上海!H7N9既"發源地". 其實去上海都係一個好臨時既決定,全因為男朋友上左去工幹!咁不如偷一個weekend黎短聚小休一下! 由於時間緊迫,機票都係叫機師朋友買!返工個shift叫同事頂!多謝各位成全我既任性! 係成功到達上海既酒店之前,自己一個人係途上經歷左好野. 例如miss左班機要再做rebooking, 搭浮磁列車, 再迫地鐵迫到好似公司三文治咁. 唉!我先發現我原來都係一個平時比人照顧慣既死港女! 返到酒店冇耐,男朋友都放工返到黎啦!噢!有你真好!我又可以繼續被照顧啦! (P.S. 酒店網絡唔洗翻牆都可以上到FB哦) 經過一日既周車勞動,是日晚餐決定係酒店附近食就算啦! 不過當然唔可以求其啦! 今晚選擇食既上海菜係已經去左上海做野幾年既香港朋事推介既. (唔好意思,唔記得左餐廳叫咩名,地點位於人民廣場對而某商場內) 餐廳環境唔錯,可以望到南京西路,即南京步行街一帶.不過唯一唔習慣既係內地可以係室內食煙呢個問題! 我地一行工人叫左六個餸!全部食晒! 阿婆糖醋骨 芥香油爆蝦 四喜烤麩 蛤肉欖白四季豆 青蟹蒸飯 金蒜牛柳粒 第二日既行程都係食食食同行行行.由於星期六男朋友仍然要返半日工,所以上海地膽就做住我個guide先,帶我周圍走下. 第一站當然係轉個彎就到既小楊生煎啦!哈哈! 雖然之前已經黎過好幾次上海,不過都冇食過小楊小煎,因為都太多人啦! 幸好今次遇正係工作天, 所以唔洗等咁耐! (雖然係星期六,但係因為國內要遷就五一黃日周假期,所以星期六佢地都係要返工) 小楊生煎包有幾好味,相信唔洗我講,食過既朋友一定知道! 入面juicy到好似食小籠咁!要先咬一口,飲左入面D汁先可以再食.而且肉汁好有膠質!食完個咀仲會有”痴住”既感覺! 食完小楊生煎我地就再轉場過對面既佳家小籠包!好多朋友去上海都只會去南翔食小籠包,不過如果講味道,佳家的確不輸南翔!而且價錢更平民化. 一籠十二個既小籠包,即叩即蒸,所以等既時間就會比較長! 食到飽晒之後,可以向觀光點出發! 其實所謂既觀光點,都只係純粹hea下時間等男朋友放工…… 遠離繁忙既商業區,我地黎到漕寶路既七寶古鎮! 古鎮就好似水鄉咁,由一條河流貫穿. 感覺有D似烏鎮! 地方雖然唔係好大, 不過環境古色古香都幾靚,有時間都值得黎睇睇. 日落黃昏,我地由古鎮去到田子坊. 係田子坊入面逛左一逛,預覽一下唔同既食肆,為晚餐作準備! 我好鍾意田子坊既老地方味道! 對比市中心既現代化,田子坊更有味道! 不過個度既建築物差不多全部都一樣樣,方向感差D就比較容易迷路啦! 食左咁多餐, 黎到田子坊呢個咁西化既地區,都係要食返D西餐. 時間尚早,我地可以選擇座閣樓近住小陽台! 感覺好relax! 有點身處外國既感覺! 由於西餐份量較大, 所以我地只係叫左四樣野食: 凱撒沙律, 炸洋蔥, 一個burger同一份steak! 炸洋蔥雖然樣子唔多討好,不過味道卻出奇地好食! 最緊要係一D都唔油! 比起香港好多餐廳做得更出色! 可惜Steak就比較肥, 連隔離枱都投訴!不過overall黎講都唔錯! 食完晚餐.再係田子坊入面行多左陣. 誤打誤撞入左間賣茶既鋪頭. 店員見我地拎起D茶黎睇,好熱情咁請我地試茶.因為我怕夜晚飲茶會訓唔著, 所以留比身邊既朋友試.不過最後一行三人都座低左試飲唔同既茶! 試茶其間,同店員傾傾下先知原來佢係來自福建!唔怪得冇咁重北方口音啦! 最重要係聽得明我地呢D咁普通既普通話嘛! 結束係田子坊既行程, 我地就搭的士返返去人民廣場. 同事仔返屋企休息,而我同男朋友就繼續一直行去外灘拍拖拖啦!哈哈! 唔知點解每一次黎上海都要去外灘?! 總係覺得個度既建築物加上燈光好靚! 本來我地想去和平飯台度聽JAZZ, 可惜是日星期六,一早已經full晒! 唯有寄望下次啦! 最後一日係上海,只有半日既時間! 爭取最後一次食小楊生煎既機會! 今次到我帶男朋友去食啦! 男朋友都讚不絕口! 上海對我黎講其實冇乜手信好買! 我又唔會買隻金華火腿返黎! 所以只係係上海第一食品買左D雲片糕,花生酥等等既小零食. 記得小時候我好鍾意食雲片糕,依家大個左食返,都唔知有咩咁好食?! 不過媽媽話呢個雲片糕好味!係小時候既味道! 我都總算冇買錯野! 三日兩既速遊上海咁就結束啦! 返到香港仲要比同事”歧視”左一陣,話要隔離! 去左上海,睇過當地情況就會知道,其實H7N9冇想像中咁可怕!