前排大時大節,成日食咁多好野,假日之後都想食返D清淡D既野.今日為大家介紹既係魚蛋粉. 成日都唔明點解係潮州粉麵店叫碗魚蛋粉都要三十幾蚊?但係我終於搵到一間好有可能係全港能夠提供又平又有質素既魚蛋粉既鋪頭. 屯門既朋友有福啦!呢間魚蛋粉都算係我食過最好味既魚蛋粉!首先介紹一下呢間鋪頭先. 成泰麵家已經係屯門區屹立左好多年,根據屯門朋友資料既提供,最早期係係磨菇亭度營業,之後就搬左去安定村街市附近美食中心,前排又再搬左過對面安定商場下面地鋪.(如有錯誤請更正,因為屯門地區唔太熟)雖然鋪租越黎越貴,但係咁多年黎一碗魚蛋粉都只係加左幾蚊!依家都只不過係HK$21碗.唔好以為咁平一定好細碗食唔飽人呀!只要你唔係參加完饑饉三十一定冇問題! 究竟成泰麵家幾魚蛋有幾好食呢?我盡量用我最大既努力黎形容一下. 首先: 魚蛋夠彈牙! 睇過周星馳部食神既朋友都知何謂彈口架啦! 第二就係有魚味!好多時候係出面食到既魚蛋只有彈口既感覺,而冇魚味.但係成泰既魚蛋就能兩者都做到啦!聽聞佢地既魚蛋係用本地既魚自己打架!唔怪得咁好味啦!除左魚蛋正之外,魚片頭更係一絕!炸過之後令魚片既味道又提升一級!不過唔係個個叫魚蛋粉都有魚片頭架!同老細混熟D啦!哈哈! 去潮州粉麵食魚蛋粉又點少得辣椒油呢?!成泰既辣椒油又係另一推介!辣椒油唔係只係得個辣字,而係又辣又香!連我唔係好食得辣既人都愛上呢度既辣椒油呀!又係自家製架!大家鍾意既仲可以一樽咁買走添. 大家去開屯門就去試下呢間成泰麵家啦!誠意推介呀!
