第三日既泰豪爽之旅係成個birthday trip既重頭戲!亦都係最豪爽既一日!今日只會有兩個活動:就係先做一個四個鐘頭既Spa,之後再去全球最高戶外餐廳Sirocco食pre birthday dinner. 今次做既呢間Spa叫做So Thai Spa位於Asoke,又係朋友仔介紹既.上佢地個網址睇左簡介,見到佢地做緊個promotion: Luxury Package special couple price (4 hrs) 5,000 bhat for 2 person.對返港紙其實相對地都貴貴地架,不過個package入面都包多野架: Foot soak& clean Thai food massage Gold body scrub Herbal ball or facial Aromatherapy message Relaxing head message 呢個Spa係出發之前已經book好左,佢地亦都好快有回覆.我本來係book 11:30做架,不過佢地回覆呢個時段唔得,比左其他兩個時間我揀.但係我又要夾返今晚食飯既時間,所以又唔想太晏先做.佢地亦都好好比多左另一個選擇我,就係去佢地同一集團後面街既另一間Spa (The Eugenia Hotel& Spa)度做,可以offer我同一個價錢同package.即刻上佢地個website度睇下先.間野個樣都好似幾靚喎!個price range仲要比So Thia Spa貴少少!好啦!就呢間啦! The Eugenia Hotel & Spa (phot captured from offical website) 出發之前都要食D野醫醫肚架!做成四個鐘喎!絕不能夠空肚去做Spa既!但係又唔好食咁飽!所以少少地去食水門海南雞飯啦!食完之後就搭的士去啦! 其實間Spa係位於Asoke同Phrom Phong之間,從地圖上睇上黎就好似唔係好遠可以行去,不過介紹我去既朋友就建議搭的士啦,因為如果要行都真係要行一段路!呢晒間Spa未必係遊客熱門會去既Spa,所以的士司機都唔係好知正確地位係邊?我地比左個地圖佢睇,都只係可以車到我地去So Thai Spa.係溝通唔到既情況下,我地決定落車自己走入去So Thai Spa度問.雖然我地唔係book左呢間Spa,不過職員都好好咁教我地點行!原來都真係係後一條街架咋! 到左The Eugenia Hotel& Spa門口,就有見到好多古董車係度.Secure一見到我地就行出黎,我話我地係黎做Spa既,佢就推門帶我地入去.門口雖然細細,但係一入到去就完全唔同!個大廳好有歐洲古典味!客人要穿過大廳先可以去到做Spa既reception. Reception就係箭咀所示位置 Reception其實好細,只係一個樓梯口,但係出面就有個幾大既泳池(但係D水綠色既)環境都算開揚!Reception姐姐操一口流利既英文同我地對話, 我都未講自己用咩名做reservation佢已經開口啦!首先佢會同我地confirm一次我地book左既package同埋幾多錢,跟住就請我地揀自己鍾意既精油準備陣間做Aromatherapy massage. 係雲雲既精油當中我揀左mok,而男朋友就揀左lemonglass.其實mok既中文係咩我都唔知,不過聞落去好香!比完錢之後就由按摩師帶領我地上去樓上.我地沿住木樓梯一直拾級而上,呢個環境不其然令我諗起係英國舅婆既屋企,因為係一模一樣!我地行上一層行又再行上一層,心諗”嘩!越行越上啦喎!究竟要行到邊層?”答案揭曉啦!就係去到最頂層既閣樓!嘩!感覺好高級呀!唔知係咪因為我預早預約,而且仲係做最貴個個package呢?哈哈哈! 六款精油任揀 按摩姐姐入到房之後請我地換上即棄既底褲仔同浴袍,之後就開始為我地洗腳做清潔.按摩姐姐梗係成日都接觸到磨沙,對手好滑呀!勁過用SK-II呀!哈哈哈! Foot soak & clean area 清潔完就可以訓上按摩床度享受餘下既水療啦!當我訓左上去張按摩床度之後,我有個感覺自己就好似個廢人咁癱左係張床度做”癱己”!乜都唔洗做就有人服侍你! 唔知點解去到邊度做Spa都好, 都會第一時間用條毛巾遮住你對眼?可能咁樣relax D掛?不過我個人好八卦,好想睇下究竟佢地係度做緊乜野! 位於閣樓既按摩房 因為呢個package係做四個鐘,所以每一個step都做好耐!做緊foot massage個時我都差唔多訓著左啦!哈哈哈!冷氣涼涼地,按摩姐姐貼心地為我蓋上毛毯,只係伸出需要做按摩既地方.做完foot massage之後就會請你轉身做磨沙!哎呀!始終要赤裸裸咁比個唔識既人望住仲要摩黎摩去,點都會有D尷尬!不過眼不見為乾淨!我有條手巾仔遮住乜都睇唔到!可能呢個就係呢毛巾仔既用途!哈哈! 按摩姐姐好專業,唔好刻意係D敏感地方摸黎摸去!點到即止! 做完磨沙之後,按摩姐姐就會請我地到旁邊既浴室沖身!呢個閣樓有埋自己既獨立浴室唔洗行黎行去,好方便! 而同一時間,按摩姐姐亦為我地準備左小茶點:果醬餅乾同茶. 有椰香味既茶同果醬餅乾 小休完一陣就到左我最鍾意既herbal ball時間啦! Herbal ball暖笠笠咁係我身體上面按壓!真係好舒服同relax!按摩姐姐會不斷更換herbal ball, 按涼左就換一個,務求每一個herbal ball都係暖既! 全身上上下下左左右右前前後後都按晒!正!我又係呢一part訓著教啦! Herbal ball + Scrub 最後就係Aromatherapy massage既時間! 按摩姐姐就會用之前我地揀好左既精油為我地做按摩! 精油既味道圍繞住我全身,感覺好relax! 又唔會比男朋友隻精油味搶左! 按摩完之後陣精油味都仲可以last多一段時間!好正呀!我最鍾意香噴噴!好似噴左香水咁! 到最後就係到head massage啦! 除左頭之外,其實都會幫你按埋膊頭等位置!即係你平時係電視度見到成個人壓係你背脊個D! 開頭我都會驚痛或者之後個日會周身痛!好在又唔冇喎!最緊要放鬆個人就得架啦! 四個鐘頭既Spa咁就做完啦! 我真係好佩服按摩姐姐對手可以四個鐘係咁不停壓!所以臨走前亦都禮貌地打嘗左佢地! 呢個package真係冇改錯名!果然係 luxury! 落返去樓下,reception姐姐好好咁問我地洗唔洗幫我地call的士,之後就請我地出去門口度座住等. 再一次經過個個古典味濃既大廳,咁啱預上有人係度影相拍野! 業餘攝影師男朋友話佢地D燈好pro! 返到酒店休息左一陣,趁住仲有時間就去左central world隔離個Platinum Fashion Mall度行.位置就係正Novetel酒店下面.我覺得個度都幾好行!感覺有D似香港既”香工”咁!不過呢度就每一層都會主打一款貨品.好似第一層就主打服飾,上一層就袋,再上一層就係鞋等等…… 行完我地就返返去酒店裝身準備去Sirocco啦! P.S. 夜既沖涼時你就會發現成個身都真係滑左好多呀! 下回預告: 全球最高戶外餐廳Sirocco有幾grand? Bangkok夜境有幾靚? Sirocco野食究竟有幾貴? 又有咩limitation?下回分解. Useful information: So Thai Spa: http://www.sothaispa.com/ The Eugenia Spa & Hotel: http://www.theeugenia.com/index.html
