第三日既首爾之旅,行程都開始接近尾聲.因為第四日既planning會去南怡島,所以今日會係最後一日係首爾市.想去既地方都差唔多去晒,今日就去shopping一下,去下首爾其中一間好出名既大學~梨花女子大學感受一下,做半日我的野蠻女友啦! 之前聽聞梨大一帶既野都好平,因為近住大學,好多野食或者衫都係學生價,所以大家都可以留返D彈藥係度shopping.不過坦白講,梨大同新村一帶既target始終都係一班學生,消費力未必及得上打工仔,所以賣既野/style同明洞唔同. 一出左地鐵站,第一時間醫下肚先!沿住梨大購物街(地鐵2號出口),兩旁都有好多路邊小食攤,賣既都會傳統韓國小食,好似炒年糕咁.不過我地想座得舒服D,所以最後揀左一間近住梨大輕食店~加味. 我地order左一客雞絲拉麵同芝士炒年糕.個麵就冇乜特別,不過個年糕入面加左腐皮同鶄鶉蛋.甜甜地辣辣地,都幾好食. 點擊圖片放大 食飽飽之後就向梨大出發!係梨大購物街一路直行就可以去到梨花女子大學!好容易搵到咋!一條大直路!講開梨花女子大學,佢係全韓國第一間女子大學,亦係全世界面績最大既女子大學.但係我記得梨大係有男仔讀架!我男朋友都不知幾想係度讀,日日眼睛想旅行! 大家一見到呢個唔知係教堂定hall既建築一定會諗起"我的野蠻女友"呢套戲!所以個個都會係度影相留念.不過要影埋個頂都唔易架!要行返落兩級"底炒"先得!如果唔係就冇左個頂架啦!當日我地仲遇到好多香港人添!有個爸爸自己一個人係度拎住部電話係咁影,唔知佢係咪想佢女女係度讀書呢? 梨大個campus都真係幾大!沿住長樓梯上去,右手邊仲有好多建築物!全部都係用花岡岩石起,影相好靚架!係小花園度仲有個石像,原來係梨大既創辦人! 睇完D古舊既建築,想要現代化D既都有.呢個building都可以算係另一個梨大既signature building. 唔好睇呢條樓梯好似好長,其實好快就行完.不過呢條平平無奇既樓梯,兩旁其實隱藏住各個課室!真係好想入去睇下,為免影響到學生,謝絕一切非學生內進.呢間大學既環境都幾舒服,又夠大又多花草樹木,名聲又好!唔怪得咁多父母想仔女黎讀啦! 做完我的野蠻女友,去左附近既cafe度休息一下,食個雪糕飲杯咖啡,之後再出發去shopping!除左梨大購物街,附近都有好多橫街窄巷,價錢有平有貴.如果有D野明洞又有梨大又有,就梗係係梨大度買啦,因為真係平過明洞架!特別係襪仔呀!!! 行完梨大,本來想去弘大既咖啡王子一號店,但係好似有D遠,最後都係放棄左,留待下次先去啦.冇去到弘大,轉戰左去新村.新村同梨大就好似旺角同油麻地咁近,行過去就得架啦!大概行十分鐘左右啦!為免自己行錯路,都係問下人先.我就好彩咁遇到會講中文既旅遊大使!溝通完全冇問題呀!好多時候,係旅客區大家都會見到有D人著住件紅色既小背心,上文寫住漢語/英語,其實都係旅遊大使,方便各位遊客詢問! 去到新村行左一陣,又有D攰,最後只係係supermarket買左D手信就返酒店啦!雖然話supermarket買手信係比較方便同平,不過都要睇下個間supermarket既大細呀!我就係新村度中左招啦!我只能說個間係一間比較平民既supermarket......要齊全既,都係推介返首爾站既LOTTE Mart.(但係要注意:唔係明洞樂天百貨超市!唔好以為LOTTE Mart=樂天!!!唔一樣架!價錢亦差好遠!) 是日既夜餐揀左位於明洞既"柳家韓式鐵板燒專門店" (明洞地鐵站8號出口,natural republic斜對面).其實除左明洞,東大門都有分店(網友話台中都開左).主打鐵板炒雞/海鮮鍋.今次我就揀左佢地既招牌Yoogane雞排.比個溫馨提示大家,如果唔係好食得辣既朋友,記住order時同侍應講呀!因為都幾辣架! 雞排黎到之後,侍應會一條龍服務咁幫你炒,到咁上下熟就會剪細D雞排,連埋配菜/年糕/薯仔一齊炒!嘩!真係好好食呀!如果怕油煙太勁會彈到衫既,可以去counter度攞圍裙!好細心哦!只係食雞排怕唔夠飽既朋友可以再order side dish去炒.我就叫左飯同鳥冬,連埋D辣醬一樣炒,真係好好食呀!!!!!呢間柳家鐵板燒專門店下次黎一定會encore!! 炒雞排step 1: 等爐熱中...... step 2: 侍應黎幫你係咁炒 step 3: 食到咁上下再加飯/烏冬炒 食飽飽,又係滿足的一天!返酒店休息,明天向南怡島進發! (其實南怡島個篇一早發表,有興趣既朋友可以click呢度)
