第一日實在太攰啦!第二日既行程被迫delay!本來諗住一早起身去景福宮睇換班儀式,但係一切都敵不過睡魔!比左自己十萬個藉口:點解放假去旅行仲辛苦過返工?放假唔係應該要好好relax一下咩?就係咁,我就搞到差唔多十點先出發.本來plan左第一站去做咩就唔好再提啦,自由行既好處就係可以更改行程嘛!哈哈!好!去食返個元氣早餐先! 講到最元氣既韓國食品,就梗係人参雞啦!但係首爾咁多間食人參雞既,又去邊間好呢?綜合旅遊書同網上各位blogger既意見,最後揀左位於景福宮附近既土俗村.聽聞前南韓總統都好鍾意食呢間既人參雞,應該唔差得去邊啦! 但係我同當地朋友講,我地會黎土俗村食人參雞,佢竟然話唔知?!算啦!睇黎又係一個遊客先會去既地方! 去到景福宮二號出口,一出去我地就拎返個地圖出黎睇下點行既時候,我地就遇到一位好好心既大叔.佢見我地係遊客都應該估到我地係去土俗村,於是佢就係咁用D我聽唔明既韓文同我係咁雞同鴨講,教我點去.加上佢既body language,我大概都知道點去.果然,行前冇耐左轉就到左啦!一去到就已經見到大排出龍!我立刻安慰身旁既男朋友:"網上面D人話好快架咋!十五分鐘就ok架啦!"免得佢又係度唔耐煩!哈哈! 左影下右影下,十五分鐘都唔洗(大概只等左五分鐘)就可以入到去啦!原來入面好大架,唔怪得咁快可以安排到入去啦!侍應入面又有識講國語既,溝通完全no problem呀!土俗村只係賣人參雞,所以個menu你只會見到不同既人參雞! 配菜方面當然有任夾唔嬲既泡菜同蘿白.呢度既泡菜係我成個trip食過覺得最好食既!大家不防一試! 言歸正傳,講返d人參雞先,我order左一份最普通既人參雞,隨人參雞奉送左一杯人參酒!嘩!好重酒味!一大朝早不宜酒醉呀!我D行程都未去!!未出發黎韓國之前,媽咪叫我睇下人地d人參雞湯入面落咩料.好!我就影張相返去比我母親大人睇!雞入面有人參一條,栗子半粒,紅棗一粒,同埋糯米!味道比較清淡,仲以為會有好重既人參味!又或者我叫既呢款人參味冇咁重啦!總括黎講係好味既!!直得推介!男朋友仲話要encore!! 食飽飽就有氣力出發去我今日第一日既行程啦!向景福宮出發!經過地下道行去景福宮.途徑人人都會停落黎影相既”不老門”!但係…..我點睇都唔覺得係個”不”字囉!我個腦諗起一個粗口字!哈哈!大家想像一下啦! 其實景福宮係十年前既韓國之旅已經黎過,今次重遊都只係為左紅葉!網上推仲景福宮為嘗紅葉之地,咪黎睇下囉!但係睇唔睇到…….你地話呢?哈哈!又唔係話冇既,都有非常少量黃/紅葉既! (呢個trip我都要北上到南怡島先睇到叫做較多既紅葉.可以睇返我上兩篇既blog) 景福宮既正門為"光化門",下面有三小門,好容易認!而且換班儀式都會係個度進行,一定唔會同其他門混淆!(你要知道皇宮入面道道門都差唔多樣) "光化門"下面仲有代表古代唔同階級既士兵係度當值,又係一個遊客必定既影相位! 買完飛就由"興禮門"正式進入皇宮! 中國既皇帝係點樣上朝就係電視度睇得多啦,原來韓國既都差唔多.係個大廣場上面,唔同階級既宮員就會按等級企晒係度上朝.心諗:咁周星馳既九品芝麻宮咪企到最後?哈哈! 再行入D,就會去到專門舉行國宴/接待外賓既"慶會樓".設置係池邊既"慶會樓"環境一流,據說當年可以係蓮花池划船,而且登上閣樓仲可以欣賞到仁王山同皇宮既景覲! 可惜亂戰其間被火燒毀,依家淨係得返石柱! 行到"泰元殿"同"慶會樓"之間會有較大既醬庫!原來唔同大小既醬缸分別儲存唔同既醬料:大缸存醬油,小缸存魚子醬.唔知依家入面仲有冇野架呢? 係景福宮既最深處就係"香遠池"同"乾清宮"."香遠池"係一個蓮花池,環境悠閒舒適!當日仲有一位伯伯係池邊畫畫寫生! 之前講過,入黎景福宮係希望睇到紅葉,其實都有D既.最後係度送上景福宮紅葉照. 點擊圖片放大 係景福宮都行到差唔多四點幾五點,係時候上去南山塔睇日落啦! 下篇再講!
