距離上一次去首爾已經係十件前既事,個時首爾仲係叫緊漢城.十年一別,呢個地方又變化左好多!至少差不多間間護膚品鋪頭都有姐姐識講國語!唔需要擔心言語不通溝通唔到呢個問題呀! 一個月前既今日,乘搭住凌晨航班前往首爾仁川機場,到達時已經係清晨五點半.第一時間走去Olleh漫遊中心租借wifi蛋蛋.對於現今個個都用智能手機既香港人黎講,隨時隨地上網已經成為左習慣,唔租返個wifi egg點得呢?!不過最重要都係方便自由行既旅客,就算迷路都可以即時上到網搵地圖嘛!而且費用一D都唔貴,只需要8000 WON一日(大概HK$55左右)就可以使用到4G服務!Upload/Download真係比3G快好多.一個Wifi egg仲可以share比5個devices,如果一班朋友一齊用就抵晒啦.不過要注意佢既耗電量都幾勁,charge滿電都只係可以長開4-5個鐘.建議大家有需要先開.而且較偏僻地方會收唔到(例如:南怡島,如果只係係首爾時內使用應該冇問題). portable size既wifi egg.只需要係電話度搜尋"olleh_egg"既service provider,然後輸入黑色貼紙上既password就得啦! (租借地點:入境大堂8至9號閘口) 租完wifi蛋蛋就出機場搵巴士去酒店啦!今次所選既酒店係位於東大門既Acacia hotel,坐6001號機場巴士前往東大門方向就可以直達門口,十分方便.巴士上仲有巴士路線圖,例明會係邊幾間酒店度停,而且每一站都有韓/英廣播,所以唔需要擔心過左站或唔識落車.(機場巴士費用14000 won) 其實去首爾旅行,個人黎講酒店要求唔會太高,只要近地鐵站就ok啦.入到酒店房,感覺有點兒殘舊(可能燈光比較暗),但係算係乾淨既.浴室個按摩浴池加返唔少分哦! 讚!(如果有睇過我上幾遍講澳門既文章都知道我對浴池比有要求)打開房入面唯一一個窗,原來可以望南山塔架!好!又加多少少分啦!每日都玩到好攰先返酒店,所以都唔會太要求太多啦! 晨咁早到步,好多鋪頭都未開,唯有去d觀光下先啦.第一站我地就出發去惠化站睇壁畫.去到惠化站,個人仲係唔係好醒,去左starbucks食左個三文治飲左杯咖啡,坐一坐先出發.呢個用紅磚starbucks好靚呀!好有歐洲風味. 住係惠化區既人係咪個個都咁多藝術細胞架呢?幅幅壁畫都好靚!不過可能太多旅遊出入令居民困擾,我見到有d壁畫已經被人油左......係香港只會係幼稚園門口見到有壁畫,或者旺角後巷既graftti. 點擊圖片放大 沿住壁畫一路向上行,最後行到去駱山公園.係公園度可以遠望到南山塔同睇晒成個大學路既境.行到去最高位置會見到一道城牆,據說係歷史遺跡黎架.城牆上仲有當時預留比炮彈用既窿. 行到接近中午時份,我地就離開惠化前往明洞啦. 根據朋友經驗,係明洞對won既rating係最好既,仲高過係香港對!所以大家真係冇需要係香港對太多,夠搭車就ok啦!係明洞有好多大大小小唔同既foreign exchange,但係rating機本上都一樣,所以冇需要花咁多時間去格價. 明洞係女人shopping既天堂!間間skincare鋪頭都有sales姐姐企係門口拉客,又大送贈品!入到去更加不得了!見你係遊客仲要係講中文(不論講廣東話定國語),就必定會搵個講中國語既姐姐黎招呼你!至少我去左咁多間鋪頭,十間都有九間半都係有人識講國語!可想而知中國人個market幾大!由於明洞係我血拼既地方,相就冇多影啦!大家都係去盡情揮霍啦!不過可以同大家分享一D小心得:我認為明洞既鋪頭送既sample比係梨花既仲多,但係都當然視乎你買幾多野啦!如果要買market o既朋友可以試下去明洞後面既巷仔格下價.我上次就係巷仔尋到最平既market o,比supermarket仲要平少少哦!士多老板娘仲以為我地係日本人,係咁同我地講日本,仲送左兩支多多比我地添.如果要買雪花秀/langie等等韓國brand,可以去lotte duty free.因為真係平過出面,一來tax free,二來比白金卡可以有九拆,夾夾埋埋就平唔少架啦!Tax refund就唔講啦!一個字~煩! 血拼完返酒店小休一下,等當地朋友黎接我地. 唔知係咪”江南Style”既關係,朋友為我地準備左一個江南遊.係食晚飯之前,朋友帶左我地去汝矣島.其實之前睇旅遊書都有介紹過呢個地方,不過似乎係一個政治經濟區,本來都冇諗住去,但係原來個度好舒服好relax!汝矣渡口站個度有個漢江市民公園,好比人都帶晒野食黎野餐!面對住漢江,人都輕鬆D! 汝矣島地標 63大廈 係夜晚既漢江遊之前,食少少野先!係碼頭附近有間船餐廳,你可以ORDER野食上樓上,又或者到下層玩水上活動.日落黃昏,係漢江上食炸雞, 一樂也! 點擊圖片放大 到左7:30,我地就上船去遊漢江.船上面有魔術表演,可惜只有韓文,唔知佢講乜?!所以我地就去左出去睇風景! 歷時一個小時既漢江遊之後,終於可以去食晚餐啦!第一晚黎到韓國,梗係要食一食韓燒先啦!朋友好好咁帶左我地去漢江既另一邊食韓燒,又係對住漢江既一餐飯.雖然味道唔係最好,不過個VIEW就一流啦! 可惜我唔記得問個度係邊度…..回程返酒店時諗住睇下搭地鐵座咩線啦, 點知發現原來我拎住個本12-13年出版既旅遊書都係唔UPDATE架!!!!!有條新既地鐵線冇左!!!! 第一日既行程超級攰!返左酒店即刻訓…… ~第一日完~
