休息咗一日，行程嘅第五日，終於正式出發欣賞西藏啦！我哋天未光就出發等包車司機，講番包車司機先，我哋呢個行程總共包司機十日，由佢負責幫我哋安排沿途食宿、酒店咁。雖然去到拉薩都幾容易搵到拼團，例如林芝三日遊、市內一日遊，不過我覺得都係揀一次過包車十日比較好！因為去西藏要搞邊防證，由包車哥哥幫我哋搞方便好多，加上港澳台居民唔可以亂咁入住當地的酒店，有規定一定要住喺某邊幾間酒店咁，如果要自己book或者跟拼團，可能未必會幫香港人諗得咁周到!! 至於呢個包車哥哥，我都要讚一讚佢!!成個行程佢有幫我哋慳錢，佢覺得有啲觀景台唔值得畀錢嘅話，就會車我哋去附近嘅地方影相，唔會專登帶我哋入去。同埋多得佢預早book定住宿，我哋先可以喺國慶黃金週時住到珠峰大本營同埋納木措湖邊，國慶期間周圍真係好多人呀!!所以下次我再去西藏的話，我都會搵番沈大哥的!! 好啦，講番個行程先，因為西藏真係好大好大，所以呢個行程編排到一日主要搭長途車，另一日就會休閑啲多啲景點咁，費事我哋日日都搭長途車咁悶。我哋呢幾日大致嘅行程係咁: D5: 拉薩 → 林芝 D6: 林芝 → 色季拉山 → 魯朗 → 然烏 D7: 然烏 → 米堆冰川 →林芝 D8: 林芝 → 雅魯藏布大峽谷 → 米林 D9: 米林 → 山南 D10: 山南 → 羊湖 → 日喀則 D11: 日喀則 → 珠峰大本營 D12: 珠峰大本營 → 日喀則 D13: 日喀則 → 納木措 D14: 納木措 → 拉薩 除咗雅魯藏布大峽谷外，我對於其他景點都好滿意。本身未出發前，上網睇西藏風景嘅相，已經覺得好靚，但去到親身睇，真係震撼萬倍呀! D5: 因為不幸地我哋去嗰日318國道修路，所以我哋要兜路，真係搭足一日車，沿途風景: 經幡真係好靚 D6: 呢日比較多行程，好多景色睇 海拔4720米嘅色季拉山，行程第1次上咁高，不過因為好多樹，所以呼吸都唔算好困難 魯朗林海，好似卡通飄零燕嘅場景，嗰刻覺得自己好似置身北歐一樣 沿途經過嘅橋，實在太靚，一定要放上網呀! D7: 米堆冰川真係好靚好靚!!!要睇米堆冰川需要行一個鐘左右，全段路其實都算易行，不過行到最後一段路有好多樓梯，要喺高海拔地方行咁多樓梯的確係唔容易，但我覺得係值得嘅!! 行嘅時候一路望住冰川，真係靚到唔識形容! 行到盡頭，親眼望到冰川嘅宏大! D8: 雅魯藏布大峽谷，我對大峽谷唔滿意嘅地方，首先係因為入場費好貴，要240蚊人民幣，二來係因為我哋坐園區嘅大巴士入去，每個景點都好趕，三來係佢所謂的景點都有啲廢 轉三圈轉運嘅大石都係景點.......... 睇河流時間20分鐘.......... 最重點係我哋去嗰日因為陰天，睇唔到南迦巴瓦峰!!!!!!!!!所以我覺得如果天氣，真係可以唔使去大峽谷都得!!!
