一落火車，真係會覺得呼吸真係比起香港困難！好明顯感覺到氧氣不足！不過呢個感覺好似得我有，同行四位朋友好似無呢個感覺，真係每個人面對高海拔地方的反應都不一樣呢！過咗安檢後(因為我哋係香港人，所以安檢要搞一輪，唔係立即就走得去的)，好彩包車司機沈大哥車我哋去旅館度，如果要自己搵車的話真係好煩，因為火車站同民宿有一段距離，加上個人本身唔太舒服，所以真係好感謝包車哥哥車我哋！ 呢間係我哋住嘅旅館，一入到去就覺得好靚，夜晚仲可以行上天台遠望布達拉宮添，價錢亦唔貴，最重點係終於有一個乾淨嘅廁所可以去了，好感恩。但大家記住唔好洗頭住，因為一洗頭就好易有高反了!! (遠望布達拉宮真係好靚 好靚 好靚 <--要講三次 好強調) 我哋安頓咗一陣後，就出去附近搵野食，雖然只係去附近行下，但真係會唔夠氣，真係要行得好慢好慢先得。第一餐我哋清清地食咗一碗米粉，不過都係無咩胃口，半碗都食唔到!!第二日我哋喺旅館附近行，周圍嘅地方都好靚好有民族特色，我哋一直慢慢行，一路慢慢影相，不過我行行下都係唔太舒服，要返咗旅館度抖下。所以勸喻大家，剛到埗西藏都係唔係郁動咁多，最好都係瞓下覺，等自己身體多啲時間適應。 一路行住，望到個天同地面咁近，真係覺得好特別好新奇!!! (因為到埗後不太舒服，所以今次文章好短，sosad)
