今次我哋去西藏選擇搭火車，因為知道青藏鐵路沿途嘅景色好靚，同埋未試過搭長途火車，所以好想挑戰下! 買廣州去拉薩嘅火車飛有幾種方式嘅，可以揀官網(www.12306.cn)、ctrip網或者親身去紅磡中國鐵路售票處買。我哋今次選擇喺紅磡度買火車飛，因為官網買的話要大陸銀行卡同埋身份證 (香港人好唔方便)，而經ctrip買的話，好快就會無飛，為求穩陣起見，我哋選擇去紅磡買啦! 去紅磡買的話預番大概一個月前左右啦，買飛前可以打去客服度問下佢哋實際開賣的日期係幾時 (我哋買飛前打咗好多次電話過去，客服姐姐應該被我哋逼癲了!)。我哋買嘅火車飛係9月21日，而開賣日期係8月25日!!個度開朝早8點嘅，我哋一早就去到等佢開門，不過好彩當日無人排隊，我哋好順利就買到飛了!!不過要留意番，紅磡買嘅飛每日只有4張軟臥，我哋一行人有5個，所以有一位要買硬臥，不過車卡是相通的，所以除咗瞓覺外，我哋五個人大部分都係留喺車廂入面。 好啦，等咗一個月，終於到9月21日出發之日!!我哋選擇喺深圳搭和諧號去廣州站，不過去到 深圳買飛先知，本身深圳去廣州班和諧號時間延遲咗，要11點半先開車，但我哋11:45am就要上車，根本就趕唔切!!於是我哋只好搭去廣州東站，然後喺廣州東站搭的士去到廣州站，幸好有驚無險，趕得切上車!!! 呢架火車是由廣州去西寧的，去到西寧要再轉車。軟臥的車卡好窄，我哋個行李箱放咗喺度已經霸咗成個位!其實佢係有位放行李嘅，不過喺上層床旁邊，真係好難將個喼放上去!!所以我哋只好咁樣擺行李啦。 火車上面是無得沖涼，所以記得帶濕紙巾清潔下身體咁!!我覺得廣州去西寧嘅衛生環境都唔錯嘅，因為本身架車唔太多人，所以個廁所都唔算好臭，洗面嘅位置都keep住幾乾淨，同埋有熱水斟嘅，好方便沖杯麵食!! 難得搭火車，當然是試下餐卡啦，我哋第1日嘅晚餐就去咗試，不過我哋只係食咗1餐，因為D野食都唔平，每碟要40蚊，寧願畀20蚊買一個飯盒! 以下係餐卡食物，都係主要食川菜咁，無咩特別，唔難食，不過唔平咁。 呢個就係買的飯盒，至於蘋果同埋車厘子係喺停站時買的。有時經過一啲大站會停得耐啲，而大站度會有啲小販兜售小食、生果之類，價錢大概20蚊左右，唔太貴 好啦，搭到第二日黃昏時間時，我哋終於去到西寧，換咗第二架火車! 呢架火車可以用全滿狀態嚟形容，好多人!!所以呢架車嘅廁所真係好臭，好臭，好臭!!!不過呢架車沿途風景真係好靚，所以雖然廁所好臭，但我都搭得好開心! 因為火車會經過唐古拉山，個度海拔有5000米，所以呢架火車會提供供氧口，唔舒服的話可以吸! 本身以為搭55個鐘頭嘅火車會好辛苦，、好悶，不過搭完我又唔覺得!!因為大部分時間都係瞓覺，特別係西寧去拉薩嗰段火車，因為海拔愈來愈高，個人會好攰，所以我諗我嗰程大部分時間都係瞓覺!!而唔瞓覺嘅時候，我哋就會出走廊度坐下，或者搵下火車上面嘅服務員吹下水咁，傾傾下咁就三日lu!!去到9月23日下午5點左右，我哋終於到達目的地啦，好感動呀!! 火車上有幾點留意: 1. 軟臥可以鎖門，不過要搵火車服務員先鎖到 2. 硬臥夜晚10點會閂燈，所以唔好太晏去瞓呀! 3. 每個站的停車時間不同，想落車的話最好搵火車服務員問問會等幾耐 4. 記得帶杯麵去食!!
