今日去咗喺日本鼎鼎大名，喺姻緣界呼風喚雨嘅東京大神宮呀！到底佢有乜嘢咁巴閉？話晒叫做東京五社之一嘅佢，出晒名求姻緣最靈最有口碑，真係嚟過求緣份嘅都會好快有好消息，呢個神社啱晒成日呱呱嘈話自己係單身狗嘅朋友，嚟拜一拜，可能好快就脫單成功㗎啦...呵呵。 而我今日黎嘅目的絕對唔係關於求愛，其實只不過喺順路又近又經過，所以入嚟做左樣我諗係絕大部份香港人都想做既嘢，如果大家有留意時事新聞嘅話，喺早排有個內地嘅微博網紅，po 左佢係神社拆左光復香港嘅祈願牌，仲話見一個拆一個，身為黃到不能再黃嘅我，當然要見招拆招，每路過一個神社就掛上我嘅祈願啦！但係我覺得呢位網紅嘅行為，已經無關政治因素，對於我嚟講神社一個好神聖嘅地方，唔應該因為個人嘅情緒，而去破壞其他人嘅祈願，咁樣嘅行為好唔尊重人。 ^ 入去前記住要洗手喔 參拜方面可以參考官方網站嘅指引，咁就唔怕做錯啦。 http://www.tokyodaijingu.or.jp/sanpai/index.html IMG_4387.TRIM ^ 花祈願繪馬 ( 500円，每月依「花曆」更改圖案 ) 最後「東京大神宮」嘅御守都係出晒名又可愛又多元化，家庭、健康、愛情、學業等等全部都有，而且設計方面仲好可愛，我自己就揀咗個健康嘅御守，因為我自己覺得神社係一個比較莊嚴嘅地方，所以就冇特別影好多相，如果係有關御守嘅選擇都可以參考官方網站有關御守嘅介紹喔。 http://www.tokyodaijingu.or.jp/ofuda_omamori/index.html 有關御守嘅溫馨提示 日本嘅御守有好多唔同嘅功能，如果你係出自真心想求嗰一樣嘢嘅保守，就要留意番使用期限，通常都係一年，最長就三年左右，購買嘅時候可以問返神社嘅負責人。 有關處理過期御守 過期嘅御守，最好就梗係還番俾當初買入嘅個間神社啦，如果自己冇辦法又一年後去多次，都可以托咁岩要去開日本嘅朋友，幫你寄翻俾當時買入嘅神社，兩個方法都聽落好似好麻煩？其實都可以自行處理嘅，只要跟以下步驟做就得喇。 需準備以下物件 : 半張白紙﹑粗鹽﹑火機或能點火的東西。 處理步驟如下 : 1. 先用白紙包住啲御守 2. 然後帶著感謝嘅心將粗鹽撒喺上面 3. 如果有適合燃燒嘅場所，就點燃白紙及御守，燃燒後嘅灰以水沖洗乾淨 4. 如果無適合燃燒嘅場所，就帶著感恩嘅心將包裹着御手嘅白紙 dum 入垃圾桶 建議可以嘅話，最好都喺以燃燒嘅方式處理。 當然啦，如果個御守喺擁有特殊回憶或者紀念品，亦都無硬性規定一定要處理嘅。 正所謂求得神多自有神庇佑，有興趣又有所求、或者純粹想觀光嘅朋友都可以去下喔。 神社名稱 : 東京大神宮 神社位置 : 〒102-0071 東京都千代田区富士見2-4-1 官方網站 : http://www.tokyodaijingu.or.jp See ya !
