我喺一個一直都為搵兩餐晏仔食既廿幾歲靚妹仔，有一日唔知挑起邊條筋，假借青春回憶既名目，同過去局限生活模式嘅自己講左句「拜拜你條尾」，姐喺同腦細劈炮呀！嚟一場裸辭去個長旅行。 喺任性妄為㗎喇，吹咩~鬼叫我仲後生咩…哈哈！雖然唔知最後結果會喺點，最多咪揮霍千金之後，再死死地去做番個普通嘅打工仔，就算喺咁，我都唔會後悔呢一個決定，因為起碼我做過吖嘛。 其實眨吓眼都已經嚟咗東京三個禮拜，每一日都可以話喺無所事事，你可能會問點解我唔珍惜每一日，好好咁去遊覽東京嘅每一個角落？因為我係想放假呀嘛！對我來講放假嘅意義，唔係一定要去搵啲嘢做，而係乜都唔需要做，真真正正好放鬆咁放一個假。 就算真係出去行下嘅我，都唔會特登上網搵有關東京嘅所謂好去處，因為我喺想隨心而行，唔想局限喺唔同嘅推介，想係用心去發掘，行下平時旅行唔會去嘅橫街窄巷，食下好本地人嘅餐廳，真正融入佢地嘅生活模式。 See Ya !
